1052/2023-2024

Mamit 6th July, 2023 : Tukin khan District Level Nasha Mukt Bharat Campaign buatsaihin Ruihhlo do beihpui thlak khuhhawnna pual kawngzawh Nasha Mukt Bharat Campaign neih a ni a, Er. H. Lalzirliana, Vice Chairman, Roads & Infrashtructure Development Board/Mamit Bialtu MLA chuan khuhhawnna leh kawngzawh a vailiam.

Er. H. Lalzirliana chuan ruihhlo do ngaihna bik District, India rampum atanga thlanchhuah 372 zinga kan tel chu a chhuanawm loh hle a, Mamit District chu ruihhlo tawlhruk kalka leh a tamna hmun kan lo ni ta reng mai a ni tiin, Mamit District Police-te leh thawktu hrang hrangte hmalakna zarah hmanni lawkah tam tham tak man a ni a, man loha relhruk tam tak pawh a awm dawn a, ruihhlo do tura hma kan lak chu a tul takzet tawh a ni a ti. Kan thalaite ruihhlo/damdawi tih tam ber chu Tripura lama siam danglam a nih tawh avangin a hlauhawm zual hle a, kumkhaw chawr lohna min siamtu ruihhlo do chu kan tihmakmawh a ni ta a ni a ti.

Bialtu MLA chuan ruihhlo ngaite hian a tirah a ngawl vei an tum ngailo a, vawi 1 tihchhin atanga ngawl vei an nih vangin, a la ti ve ngailote ruihhlo laka inveng tura tan kan lak sauh sauh a tul hle a, ruihhlo zuartute'n an tum chu a tirah tlawm te te a hralh a, a ngawl kan vei chiaha a man tihsan an hreh lo a ni tiin, kan ram leh hnam hmel tidanglam theitu zirlai rual kalkhawmte chu a do kawngah pawh tan la theuh turin a chah bawk.

Dr. Lalrinfela H, DMS Mamit pawhin thusawiin Doctor-in kan natna tidam tura damdawi min chawh ni lo kan lo hman ve chu damdawi hman sual a ni a, kan rilru kan ngaihtuahna thlenga thlak danglam vek theitu ruihhlo laka fihlim chu kan inzirtir uar sauh sauh a tul hle a ni tiin, naupangin ruihhlo an khawih tanna kailawn hmasa chu zuk leh hmuam a nih vangin hemi lakah pawh kan inven a tul thu a sawi.

Tukin kawngzawh hi Pu V.L. Remliana, District Bawrhsap chuan kaihruaiin, Pu Henry Lalhmingmawia, Hnamte, SFL, WCD chuan Nasha Mukt Bharat Campaign chungchang sawizauna neiin, Mamit Charkawn atanga SP Office, Mamit Field veng thleng kawng hi zawh a ni a. Kawngzawh tawpah hian Pu Vanlalchhuanga Chhangte, President, Sub-Hqrs. YMA chuan lawmthusawina leh ruihhlo-in mizo mipate min suat dan tarlangin, ram leh hnam venhimna atana thawktu tur Mizo mipate nasa taka tan kan lak a tul thu a sawi bawk.

Kawngzawhna-ah hian Zirlai naupang, Sawrkar Department aiawh leh tlawmngaipawlte an tel a, Kawngzawh zingah Ruihhlo do tura intiamna hming sign engemaw zat an awm bawk  a ni.