608/2023-2024

Serchhip, the 27th May, 2023: Nimin, dt. 26.05.2023 (Zirtawp) zan khan Er. Lalrinawma, SW&TA Minister, Tuikum bialtu MLA ni bawk chuan Lungpho khawtlangin zirlai hlawhtlingte chawimawina hun khawtlang huapa Community Hall-a an buatsaih chu a hmanpui.

Minister Er. Lalrinawma chuan, khawvelin a mamawh ber mihring chu mahni mawhphurna hlen thin mite an ni a, a chhan chu kan nitin nun hona kawnga kan mamawh ber te zing ami chu mahni mawhphurhna hlen thin tute an nih vang a ni. Zirlai kan ni emaw hna thawk mek tawhte kan nih pawhin kan hna leh kan zirlaiin min phut ang ngeiin mahni mawhphurna hlen hi kan ngai pawimawh ngei ngei tur a ni. Zaninah pawh zirlai leh zirtirtu, tha taka mawhphurhna hlentute hlawhtlinna kan lawm a ni, a ti. Zirlai hlawhtlingte a lawmpui thu a hrilh a, vawiina zirlai naupangte chu nakin lawka kan ram leh hnam hruaitu la ni turte an ni a, hmabak ko tak eng tak si nei mek an nih avangin engkim theihtawp chhuaha an hmachhawn zel a tul tih a hrilh a ni. Vawiina kan ram dinhmun thlirin ngaihsan tur dik kan ngaihsan a tul hle a,  dikna, rinawmna, thuawihna, tih hram hramna te leh zuk leh hmuam lam thil tha lo laka fihlim chunga kan nun kan hman a tul hle a ni, tiin kalkhawmte chu nunkawng dik leh tha zawh ngam tlat turin a fuih bawk. Minister hian Lungpho khawtlang hruaitute'n 'Zirna uar kum' thupui hmanga khawtlang an enkawlna chuan rahtha a chhuah zel a rin thu pawh a tarlang a ni.

Pu Rampanmawia Renthlei, President Lungpho Branch YMA leh Pu Lalchhanhima VC Vice President te pawhin thusawina hun hmangin Lungpho khawtlangin kum 2022 atanga zirna uar kum an puan chhan leh an kalpui dante an tarlang a. An mamawh engkim an thlen thinna leh a theihtawpa lo buaipui thintu bialtu MLA chungah lawmthu an sawi a ni.

Pu  Lalzarmawia Khiangte, VCP-in he hun hi kaihruaiin, Pi Lalfakzuali VC Member-in hunserh a hmang a, School tin aiawhin chanvo hrang hrang an hmang a ni. Zirlai hlawhtling chawimawite hi Primary, Middle School, High School, HSS, Graduate thleng niin an vaiin mi 108 an ni a. Zirlai naupang enkawl thiam nu leh pa chawimawina pawh siam sak nghal niin Pu Lalbiaktluanga VC member-in lawmthu sawi leh tawngtaiin inkhawm a khar a ni.

Minister hian nimin vek khan Lungpho Playground laih mek leh Baktawng Playground laih mekte a tlawh nghal bawk.