609/2023-2024

Champhai, the 27th May, 2023: A bial chhung fangkuala Champhaia cham mek, Law & Judicial Minister Pu T.J. Lalnuntluanga chuan vawiin chawhnu dar 2:30 khan kum 2022-2023 Academic Session-a HSLC leh HSSLC Examination-a pass tharte lawmpuina hun, Zokhawthar YMA Hall-a buatsaih chu khuallian niin a hmanpui.

Khuallian Pu T.J. Lalnuntluanga chuan zirlai hlawhtlinna changte thinlung taka a lawmpui thu sawiin, hlawhtlinna changte inlawmsaka chawimawina hun buatsaih chuan zirlaiteah phurna leh chona thar a pek thin avangin a zawngchhangthlak hle a, chhunzawm zel tum a ni, a ti a. Zirna tihhmasawn nan tanrual a pawimawh thu leh nu leh pate pawhin fate zirna an phurpui a tul thu sawiin, zirna hi khawtlang huapa ngaihhlut zawngah awm se, ngaihtuahna leh hmasawnna dik a thleng zel thei dawn a ni, a ti a. Pathian hre reng chunga zirna ngaipawimawh khua leh ramte'n hma an sawn zel dawn thu a sawi bawk.

Zokhawthar khuain zirna kawnga hlawhtling thar tam tam a nei thar chu fakawm a tih thu sawiin, zirna tih changtlun kawnga hmalakna kal mekah Zokhawthar Higher Secondary School dinhmun sang zawka hlankai a nih theih nan theihtawp chhuah mek zel a ni, a ti a. Zokhawthar chu ramri depa awm insumdawntawnna hmun pawimawh tak a nih avangin dan anga mumal zawka sumdawnna kalpui a nih theih nana theihtawp chhuaha Sawrkar laipui dawr a nih thu leh, zirna tih hmasawn hmasak a pawimawh angin a tulte bawhzuiin Mizoram Sawrkarin hma a lak thu sawiin, Ministry of Education, Department of School Education & Literacy chuan May ni 15, 2023 khan Zokhawthar RMSA Secondary School-ah Commerce leh Science Stream zirna kalpui tura pawmpuina a pek thu a sawi a; zirna kalpui dan turte duangin nakum session thar atangin zirna kalpui theih beisei a ni a, hei hian Zokhawtharah zirna huangzau zawk a chhawpchhuak thei dawn a ni, a ti bawk.

Zirlaite chu an pass-na division chu engpawh lo ni se, dinhmun tha zawk nei thei tura tun aia nasa zawka zir tura fuihin, mi hlawhtlingte chu inthlahdah mai lova theihtawp chhuah thinte leh zirnaa piangtharte an ni, a ti a. Zirlaite chu tum bik nei tur leh hlawhtlinna chang thei tura taima leh rinawm taka theihtawp chhuah tur te, pass mai nilo chhawrtlak ni thei tura lehkha zir thin turin a chah a. Hna sang leh hniam bik a awm loh thu sawiin, zirlaite chu nakin zelah eng hna pawh hmuin thawk se, taima tak leh tui taka hlawh hmutlaka thawk thin turin a chah a. Nakin lawkah hna zawnga inelna khawvelah an la awm dawn thu sawiin, mi tam tak zinga thlan chhuah ni thei turin thiamna tak tak nei tura inruahman lawk turin a fuih a. Ram leh hnam hmangaihna thinlung pu tlat tura fuihin, midangte tana malsawmna nih tum turin a chah bawk a. Social media hman nasatin zirlaiteah nghawng tha lo a thlen dan leh nih tum angte a nih loh tir theih dante tarlangin, zirlai puitu atan nilo thil dangah chuan social media hman chintawk nei turin a chah bawk a. Zirlaite chu Pathian tihna nena lehkha zir tura fuihin, an kalzelna turah duhsakna a hlan a ni.

He hun hi Pu Lalzidinga Kawlni-in kaihruaiin Upa H.Lalsawmliana'n hunserh a hmang a. Zokhawthar Higher Secondary School Principal Pu Langkapliana'n thu a sawi bawk a. VCP Pu Lalmuanpuia'n lawmthu sawiin hun hman hi a khar a ni.

Law & Judicial Minister hova Zokhawthara zirlai pass-te lawmpuina buatsaih kaltlang hian HSLC pass 36 leh HSSLC pass 27, an vaiin zirlai 63 te hnenah lawmpuina thuziak kengtel Dictionary hlan an ni.