701/2023-2024

Mamit 7th June, 2023 : Er. H. Lalzirliana, Mamit bialtu MLA, Vice Chairman, Road & Infrastructure Development Board chuan nimin Thawhlehni atanga vawiin khan a bial chhung khaw thenkhat Tuipuibari leh Rajivnagar khua bakah a chhehvel khuate tlawhin Sawrkar School Building leh BRTF kawng siam hnathawh mekte a en.

Bialtu MLA chuan kan Sawrkar-in a ngaihtuah ber chu mipuite harsatna sutkian leh an mamawh pek a ni tiin mi lawm ngailote Pathianin mal a sawm ngai lo a, thil te takte pawha lawm thinte hi Pathianin mal a sawm fo thin a ni a ti. Tuipuibari khuate'n Sawrkar enkawl High School an nei dawn ta chu a lawmpui thu sawiin khawtlang hruaitute leh khawtlang mipuite tanrualna rah a nih thu a sawi.

Mizoram Sawrkar chuan Minority hnamte a ngaipawimawh em em a. Aizawl khawpuiah ngei pawh Chakma House, Lai House, Mara House te awm tawhin tunah hian Bru hnamte tan Bru House din tum niin kan Sawrkar hotute'n hma an la chho zel ang a ti bawk.

Mamit Bialtu MLA hian a bial chhung khaw hrang hrang a tlawhna-ah hian chungkaw 21-te hnenah puan thui khawl a pe a, pheikhawk chhe siamtu mi 2 hnenah Pheikhawk chhe siamna hmanrua a pek bakah Silpaulin leh infiamna hmanrua eng emaw zat mipuite hnenah a pe bawk a ni.

Mamit bialtu MLA hi Pu Laldingliana, DEO Mamit bakah PWD Sub-Division, West Phaileng-a Engineer te'n an tawiawm a ni.