1855/2023-2024

Dated Serchhip, the 12th September, 2023: Vawiin khan Serchhip District Volleyball Association (SDVA) buatsaih Volleyball Tournament, New Serchhip Volleyball Court a neih chu Social Welfare Minister Er.Lalrinawma’n khuallian niin a hawng.

Er.Lalrinawma chuan Serchhip District Volleyball Association ten District pum huap Volleyball Tournament an buatsaih chu lawmawm tiin volleyball lama tui, talent nei tha, thalai infiammi ten hma an sawn zel theihnana tangkai a nih ngei a beisei thu a sawi. Minister chuan tunlai khawvelah sports a thang chak a, eizawnna tling a ni tawh a, Mizoram sawrkar pawhin chu chu hriain thalai infiammi te tana kawng hawng turin Sports Policy a nei hial a ni, tih a sawi a. Infiamna kawngah hlawhtling tak tak tur chuan talent neih that chauh a tawk lo a, mahni inthununtheihna leh thuawihna a pawimawh a ni, a ti.

Thalai infiammite fuihin khuallian chuan mahni invawng a, thlen chin tur inbituk a, Mizoram chhungah chauh ni lo, state pawnah leh khawvel huap pawha lang pha an nih theih nan an rilru siam turin a chah a. Player talent nei tha tak tak te pawh mahni inthunna an neih loh chuan an chuai leh mai thin tih sawiin, hlawhtlinna leh daih reina laimu chu mahni inthunun theihna hi a ni, Minister chuan a ti.

Er.Lalrinawma’n a hawn tak Volleyball Tournament ah hian Serchhip District huam chhunga khaw hrang hrang atangin an tel a. Mipa hi team 13 niin hmeichhia team 6, an vaiin team 19 an tel dawn a. Hawnna inkhawm neih zawh veleh match hmasa ber khelh nghal a ni.

Minister hian District Referee Certificate a sem nghal bawk a. He certificate hi Huntharnghaka, Hriantlang leh TC Hmingthanpuia, Bungtlang ten an dawng a ni.