1856/2023-2024

Aizawl, the 12th September 2023 : Higher & Technical Education changtu Minister Dr. R. Lalthangliana’n vawiin khan Govt. Aizawl North College ah College Building awmsa chawng li,chunga RUSA sum cheng nuai 150 senga sak belh, chawnga 5-na leh chawng 6-na ‘Construction of College Building (Vertical Extension)’ chu a hawng.

H & TE Minister Dr. R. Lalthangliana chuan RUSA sum hmanga college building sak zawh hian Aizawl North College zirlai te mamawhna, a bik takin classroom an indaihlohna engemaw chen a phuhru beisei tih sawiin khawpui pawm lam deuh a thei anga anga college hmun hman sawnchhuah leh dah chu thil tul tak anih avangin hemi kawngah Sawrkar chuan a thei angin angin hma te la in, a enzui reng a ni, a ti. Duh angin infrastructure te la nei lo mah ila, college tha tehfung NAAC Accreditation ah Sawrkar College 23 zinga 19 laiin Grade tha tak an hmu hi a lawmawm a, hetiang tehfung a hian India rama state zinga sang ber niin an tehfungah za zelah 83 kan hmu pha a, hei hi thil lawmawm tak niin kan zirna in quality a hril nghe nghe a ni, a ti.

Zirna leh khawsak phungah tunlai leh hmanlai danglam zai dan te sawiin Minister chuan awlsamna tinreng kan ban phak leh kan hman theih a awm tawh a, hengte hi hman tangkai thiam a ngai a, kan hman thiam loh chuan kan nun tichhetu an ni thei a, a nih dan tur anga taka hengte hi hmang tangkai turin zirlai naupangte hi ka duh cheu ni tiin zirlai te a fuih a ni. Mihring chawrchhuah leh dinhmun te hi nangmahni pawthniam tu ni lo sela, tumruhna leh taimakna nen thiamna tak tak nei tura in zirna in beih chuan inhawlhtling thei tlat a ni tih hi inring tlat rawh u tiin zirlai naupangte a fuih bawk a ni.

Programme hi Principal Secretary, Higher & Technical Education Department Pi Esther Lalruatkimi in kaihruaiin Dr. Zarzoliana, ASPD – RUSA in Technical Report sawiin hun a hmang a. Director Higher & Technical Education Department Pi Sangchhin Chinzah pawhin thu a sawi a ni. Upa C. Vanlalvuana, Associate Professor in hunserh hmangin College Principal Prof. Haukhanlian Mate’n lawmthu sawiin hun a khar a ni.

College Building chawng 5-na leh chawng 6-na sak thar hi cheng nuai 150 senga sak niin hengah te hian classroom bakah college mamawh room hrang hrang te dah a ni.