1857/2023-2024

Champhai the 12th September, 2023 – Self Help Group-te thil siam chhuah leh tharchhuahte phochhuahna leh hralhna hunpui Sale of Articles of Rural Artisans Society (SARAS) Fair,2023 (12th – 16th September, 2023) chu vawiin khan RD Department changtu Minister Pu Lalruatkima chuan Vanlallawma Indoor Stadium (VANIS), Kahrawt Champhaiah Ribbon chepchatin a hawng. Hawnna pual hian Kahrawt Community Hall-ah hun hman niin, he hunah hian Transport Minister Pu TJ Lalnuntluanga chu khualzahawm niin, Champhai North bialtu MLA Dr ZR Thiamsanga pawh a tel a. RD Department thawktute, Champhai District head of office-te, tlawmngai pawl, khawtlang hruaitu leh mipui thahnem tak an kalkhawm a ni.

SARAS Fair, 2023 hawnna inkhawm ah hian Self Help Group (SHG) 44-te hnenah Bank hrang hrang atangin loan vaibelchhe 2.2 pek chhuah an ni.

Hawnna inkhawm Pu R. Zarzosanga, IAS, State Mission Director MzSRLM & Commissioner & Secretary RD Department kahhruaiah RD Minister Pu Lalruatkima chuan SARAS Fair chu Self Help Group-te dinhmun chawikan leh an hmalaknate tih hlawhtlin zelna kawnga hun pawimawh tak anih thu sawiin, Champhai SARAS Fair, 2023 neih theihna tura hun leh tha leh ngaihtuahna nasa taka sengtu RD Department officials-te leh Self Help Group-te chungah lawmthu a sawi a. Kan ram leh hnam kan huaisen leh kan hlim theihna turin kan intodelh a tul hmasa a ni tiin, RD Minister chuan Rural Development Department hmalaknain livelihood scheme hrang hrang kalpui thin anih bakah Deen Dayal Upadhyaya Gram Jyoti Yojana kaltlangin thalaite tan training buatsaih thin niin he scheme hnuaia hian mi 1069 train chhuah tawh niin an zinga mi 957 chuan hna tha tak tak an hmuh thu a sawi a. Mizoramah Self Help Group (SHG) 10,708 lai awm mekin an hnuaiah member mi 84,169 zet an awm thu sawiin, heng Self Help Group te hi kan economy than len zelna turah leh kan ram intodelhna kawngah hun pawimawh tak an luah a ni, a ti a. Mizorama Self Help Group (SHG) movement a hlawhtlinna chhan pawimawh tak pakhat chu Bank-te tawiawmna avang a nih thu sawiin SHG-te an duhsakna leh an tana an thawhrimna avangin Bank thawhpui zawng zawngte chungah pawh lawmthu a sawi a ni.

A sawi zelnaah RD Minister chuan Sawrkar Laipui Ministry of Rural Development in tehkhawng hrang hrang hmanga India ram State RD Department-te a tehnaah Mizoram chuan 93.83% hmu in India ram pumah 2-na dinhmun kan luah thei hial a ni a ti a. He dinhmun hi Department thawktute thawhrim avang leh mipuiten tha taka RD Department hmalaknate an tawiawm avang a ni tiin, Mizoram mipuite chungah lawmthu a sawi a. SHG loan hmu thar te chu anih tur ang ngeia an sum puk te hmang tura chahin Champhai mipui zawng zawngte SARAS Fair, 2023 hi lo chhim ve ngei turin a sawm bawk a ni.

He huna khualzahawm Transport Minister Pu TJ Lalnuntluanga chuan Regional SARAS Fair Champhai District-a nghah a ni chu lawmawm tiin, he Fair hlawhtling taka neih anih theihna tura ruahmanna siama thawktu RD Minister Pu LAlruatkima leh a thawhpuite chungah lawmthu a sawi a. Mizoram hmun hrang hranga atanga kalkhawm Self Help Group te thil tharchhuah leh siamchhuah tha tak tak SARAS Fair-ah phochhuah a ni chuan intodelhna kawngah pawh hma kan sawn zia a ti lang chiang hle a ni tiin SHG-te hmasawnna tura mawhphurna chelhtu MzSRLM thawktute thawhrimna leh inpekna chu fakawm a tih thu a sawi a. Ram dang leh State danga in nghat lova kan economy kan tih len zel a, intodelhna kawngah tan kan lak zel a tul takzet a ni tiin Minister chuan kan State siam chhuah leh tharchhuah te kan ngaihhlut thiam a, kan phak tawk ang theuhin SHG-te pawh kan puih ve thin a tul a ni tiin, SARAS Fair lo chhim ve ngei turin Champhai District mipuite a sawm a ni.

Sales of Rural Artisans Society (SARAS) Fair hi Ministry of Rural Development Govt. of India chuan India ram state tina State Rural Livelihood Mission (SRLM) te buatsaih turin a beisei a. SARAS Fair hi Mizoramah kum 2015 atang khan hman tan niin Champhai SARAS Fair, 2023 hi Mizorama tum riat (8) neihna a ni a. Tun tum SARAS Fair ah hian RD Block 19 atangin SHG-te kalkhawmin Stall 50 leh food court pathum (3)siam a ni a. Vawiin September ni 12 atangin September ni 16 (Inrinni) thleng niin, zing dar 9 atanga tlai dar 5 thleng hawn thin a ni ang.