1858/2023-2024

Champhai the 12th September, 2023 - Vawiin khan Pu Lalruatkima, Land Revenue & Settlement (LR&S) Minister chuan Champhai District a hman tan turin, huan, lo, ram kaihhnawih document-te Information Technology (IT) hmanga dah thatna leh chhinchhiahna tur, Computerization of Registration, National Generic Documentation System chu Champhai DC Coference Hall-ah a hawng.

Hawnna inkhawm ah hian Dr ZR Thiamsanga, Vice Chairman H&FW Board chu khualzahawm niin, LR&S Secretary Pu R. Zarzosanga, LR&S Director Pu VL Hruaizela, Champhai DC & District Registrar Pu James Lalrinchhana, leh District official-te, party hruaitute, tlawmgai pawl aiawhte leh khawtlang hruaitute an tel a ni.

Computerization of Registration hi Sawrkar Laipui hmalakna niin a Software hi Department of Land Resources, Ministry of Rural Development hmalaknain NIC, Pune design a ni a. ‘One Nation, One Software’ tura duan a ni. Cloud based Server-ah Document registration te chu uluk tak a vawn that niin Mizoram chu India ramah he software hmang thei hmasa parukna kan ni a, NE states zingah pahnihna kan ni bawk. He hmalakna hi ram chhinchhiah fel mai bakah Registration Fee leh Stamp duty thlengin a tangkai hle dawn a ni.

Land Revenue & Settlement Minister Pu Lalruatkima chuan tunlai thiamna hmanga lehkha pawimawh hrang hrangte rukruk, kangmei leh chhiatrupna dang thleng thei laka vawn that a tul thu sawiin hemi kawnga huan, lo, ram kaihhnawih lehkha pawimawh vawn thatna tur ’Computerization of Registration’ hmang thei tura hawn a ni chu lawmawm a tih thu a sawi. In hmun leh ram sawrkara chhinchhiah leh chutiang lam kaihhnawih thil tinrengte awlsam zawkin mipuiten kan ti thei tawh dawn a, kan hmunhma lehkha pawimawhte Computer hmanga vawn vek an ni tawh dawn a, in hmun lei leh hralh thuah te, document bo thu ah te thlengin he hmalakna hian nasa takin min ti phuisui dawn a ni, a ti.

A sawi zelnaah Minister chuan LR&S Department chu mipui dawrtu nei ngah berte zing ami niin an hna a hautak em em a, hei hi mipuite pawhin kan hriatthiam pui a ngai takzet a ni tiin thawktu kalkhawmte pawh mipui dawrtute dawhthei taka lo dawngsawng zel thin turin a chah nawn a. LR&S hnuaia thawktu indaihlohna, a bik takin Surveyor indaihlohna avangin mipuiin harsatna an tawh thin chu Department in a hriatpui thu sawiin, Surveyor 15 lak belh turin tunah hian MSSSB nena hmalak mek a nih thu a sawi a. Mizoram thingtlang khua 319 ah te property card pe chhuak thei turin LR&S Department chu a inpuahchah mek thu pawh sawiin hemi atan hian aerial survey te pawh neih a nih tawh thu a sawi a ni.

He huna khualzahawm Dr ZR Thiamsanga, Vice Chairman H&FW Board pawhin thu sawiin Computerization of Registration, National Generic Documentation System chu Champhai District tan hmasawnna mellung pawimawh tak a ni tiin, he technology kaltlang hian ram chungchanga intihbuaina leh harsatna dang dang kan tawh thinte a tlem phah ngei a beisei thu a sawi a. Champhai District chuan tun hnaiah hmasawnna thar duhawm tak tak – GNM Nursing School, MYC Coaching Centre, Hnahlan Police Beat Post, District Hospital-a Critical Care Block sak mek te leh hmasawnna dang tam tak kan hmu thei hi kan vannei takzet a ni tiin,Covid-19 hrileng avanga harsatna leh buaina dang tam tak kara hetiang hmasawnna thlen tir tu Sawrkar hotute, thawktute leh tha taka tawiawm thin tu mipuite chungah lawmthu a sawi a ni.

Vawiin program hi LR&S Secretary Pu R. Zarzosanga’n a kaihruai a, Champhai DC Pu James Lalrinchhana chuan kalkhawmte lawmna thu sawiin, Pu K. Vanlalthiana, Jt IG of Registration chuan Technical Report a pe a, Pu VL Hruaizela Khiangte, IG of Registration & Director, LR&S chuan lawmthu sawina hun a hmang a ni.

Champhai Sub-Registrar a thawktu turte chu an mamawh hmanruate chhawp an nih tawh bakah training te pawh pek vek an ni tawh a. Online Document Registration ti duhte tana online Address chu igrmizoram.nic.in a ni.

Mizoram chhunga Stamp & Registration hna hi kum 2013 thleng khan Law & Judicial Department-in enkawlin 27th September, 2013 atang khan LR&S Department kutah dah a ni a. Director LR&S chu Inspector General of Registration niin District tinah Deputy Commissioner chu District Registrar niin Settlement Officer-te chu Sub Registrar an ni. Indian Stamp Act 1899 leh The Registration Act, 1908 te behchhan a hmalak thin a ni.