Lai Autonomous District Council inthlanna neih a hman EVM te chu tukin zing khan Strong Room ah dahluh fel niin venhimna khauhtak hnuai ah dah a ni.

EVM te hi tukin zing dar 4 khan DC Office a thlengkim a, heng EVM te hi Returning Officer leh Superintendent of Police, Official dang leh Political Party te hmuh laiin Strong Room ah kalh hnan a uluk taka ven zui a ni.

Nimin a LADC inthlanna neih ah khan Voters awmzat 45757 zing ah 38993 in vote an thlak a, a pumpuia Vote tla zat hi 85.22% a ni. Sakeilui bial chu chu vote tlak thatna ber niin, Vote awmzat 3067 atangin Vote 2884 tla in za zel ah 94.03 a tla a, Vote tlak tlemna ber chu Lawngtlai-III bial niin Vote awmzat 2042 ah 1527 tlain 74.78% a tla a ni.

LADC a Vote tlate hi naktuk zing dar 10:00 a.m atangin DC Office Complex a DC Conference Hall leh BNRGSK Hall ah te chhiar tan a ni dawn a, vote chhiar tur hian inbuatsaihna peihfel vek tawh a ni. Counting Hall No 1 DC Conference Hall ah hian dawhkan 10 hun a ni a, MDC Constituency 1 atanga 19 te chhiar a ni dawn a, Counting Hall No 2 BNRGSK Hall ah hian dawhkan 10 bawk hun niin, MDC Constituency 20 atanga 25 na te chhiar a ni thung dawn a ni.