No.7210/2020-2021 

Vawiin tlai khan Excise & Narcotics Department Minister Dr. K. Beichhua chuan Mara Thyutlia Py (MTP),Siaha Branch te ruihhlo mankhawm a halral.

Ruihhlo halral inkhawm MTP Branch Siaha office-a neihah Excise Minister Dr.K. Beichhua chuan thuchah sawiin, ruihhlo do kawngah MTP ten theihtawp an chhuah thin chu lawmawm a tih thu sawiin, MTP te chu Excise Department nen thawhhona tha tak neia, ruihhlo do kawnga thawk ho zel turin a sawm nghal a, NGO te leh Excise department thawhhona hi nunna chhanchhuahna tur a ni, a ti. 

Dr Beichhua chuan Excise Department in ruihhlo do hna a thawh kawngah Social Media velah an khap rem lo ang tiin selna an tawng nasa hle tih a sawi a, min sel duh chuan min sel rawh se, kan thalaite nunna nasa taka suattu ruihhlo do hna hi kan thawk zel dawn a ni, a ti. 

Ram siam hna hi mi tam takin an thawk lo tih sawiin mi pakhat pahnih thahnemngai te vangin ram hmel a danglam thin a, hei vang hian Excise force te pawh lian lo mah ila ruihhlo do kawngah thahnemngai taka thawk turin kan infuih thin a ni, a ti. 

Dr.K. Beichhua chuan kan ram leh hnam hmelma, ruihhlo do kawngah Excise Department, NGO, kohhran leh mipuite lungrual takin I thawkho zel ang u, tiin a sawi bawk.

MTP Branch Siaha ten ruihhlo an man khawm hi No 4 leh pills chi hrang hrang a ni a, tualchhung rate in Rs cheng 80,000 man hu a ni. Heng bakah hian Sapzu um puitling 236 leh rakzu litre 12, tualchhung rate in Rs cheng nuai 4 leh sing nga hu an man te tihchhiat a ni nghal bawk a, nikum February thla atangin Siaha khaw chhehvelah zu factory 6 tichhe tawh bawkin, a siamna bel 5, dekchi 2 leh brite 5 an man tel bawk.

Attachment

  • Loading attachment...