3562/2023-2024

Aizawl 30th January, 2024 : Vawiin chawhma dar 10:00 khan Commissionerate of Excise & Narcotics Conference Hall-ah Excise & Narcotics Minister, Pu Lalnghinglova Hmar hovin Excise & Narcotics Department Officer te chuan Department hnathawh dan thlirin hmalak zel dan tur an sawiho.

Excise & Narcotics Minister, Pu Lalnghinglova Hmar chuan, “Ruihhlo do chungchang hi kan CM chuan a ngaipawimawh hle a, Department pawh a hmun ngeiah tlawhin thuchah pawh a sawi tawh a. Kei pawhin Excise & Narcotics Department hi vawi thum ka tlawhna a ni ta der a. Tun hnaia Excise & Narcotics department te’n zu leh ruihhlo leh a kaihhnawih kan man a thahnemin a lawmawm ka ti hle. Ruihhlo hi kan khap rem vek thei kher lovang, mahse kan theihtawpin kan bei ang a, a rem duak kan beisei. Ka sawi tawh thin angin ruihhlo kan beihnaah hian Department-a hnathawktute pawhin kan thil neihsa te hi tun aia tangkaia hmangin kan theihna leh kan thiamnate kan tipung zel tur a ni,” a ti.

Excise & Narcotics Minister chuan, Department hnathawkte kan induhkhawp lo viau a ni thei; amaherawhchu kohhran thalai pawl hrang hrangte leh tlawmngai pawl hrang hrangte nen lungrual taka kan thawhho zel chuan ruihhlo dona-ah hian hma kan sawn zel ang. Hmanni lawkah kohhran hrang hranga thalai hruaitute nen kan inkawm tawh a. Remchang hmasa berah Central YMA hruaitute dawr turin Excise & Narcotics Department-te kan la leng dawn a. Tin, Department hnathawktute tan hmasawnna tur kawng hrang hrang State sawrkar leh Central sawrkar leh tanpuina awm thei ang ang atangin kan dap zel ang tiin ruihhlo dona kawnga hna kan thawhna-ah hian hei hi kan hre reng tur a ni, mimal tana tha tur chauh ngaihtuah tur kan ni lo, Ram pum tana tha tur erawh ngaihpawimawh zel tur a ni ang a ti.

Meeting hi Pu Z. Lalhmangaiha, Commissioner of Excise & Narcotics chuan a kaihruai a. District hrang hrang-a Department hotute an tel kim vek a ni.