3561/2023-2024

2024 Pawlkut thla ni 30:  Kolasib District chhunga village council (VC) pali (4) - VC06015-Kolasib Diakkawn, VC06019-Kolasib Khuangpuilam, VC06022-Kolasib Rengtekawn leh VC06050-Vairengte-III-a general seat ruak pakhat ṭheuh hnawh khah tur atan vawiin khan by-election buatsaih niin, mipuite'n zing dar 7 aṭangin boruak muanawm tak hnuaiah tluang takin vote an thlak a ni.

Kolasib District Election Officer Pu John LT Sanga chuan Kolasib khawpui chhunga by-election neihna Diakkawn leh Khuangpuilama vote thlakna hmun, polling station-te chu vote thlak laiin a tlawh a. Boruak muanawm tak hnuaia tluang leh felfai taka VC by-election buatsaih a ni chu lawmawm a tih thu sawiin, inthlan buaipuitute, political party-te leh vote thlaktu mipuite chungah lawm thu a sawi a ni.

15-Kolasib Diakkawn VC-ah MNF (Mizo National Front) leh ZPM (Zoram People's Movement) te'n candidate neiin, chawhnu dar 1 thleng khan vote awm zat 2,730 aṭangin vote 930 (34.07%) a tla tawh a. 19-Kolasib Khuangpuilam VC-ah INC (Indian National Congress), MNF leh ZPM te'n candidate neiin, chawhnu dar 1 thleng khan vote awm zat 1,166 aṭangin vote 586 (50.26%) a tla tawh a. 22-Kolasib Rengtekawn VC-ah INC, MNF leh ZPM te'n candidate neiin, chawhnu dar 1 thleng khan vote awm zat 1,059 aṭangin vote 551 (52.03%) a tla tawh a. 50-Vairengte-III VC-ah INC, MNF leh ZPM te'n candidate neiin, chawhnu dar 1 thleng khan vote awm zat 890 aṭangin vote 504 (56.63%) a tla tawh a. Kolasib District chhunga VC pali-ah hian a pum puia vote awm zat 5,845 aṭangin chawhnu dar 1 thleng khan vote 2,571 (43.99%) a tla tawh a ni.

Inthlannaa vote tlate hi vote thlak zawh hun tiam, tlai dar 4 hnuah tih tur ṭulte tihfel a nih hnuah polling station hmunah chhiar zui nghal a ni ang.