3560/2023-2024

2024 Pawlkut thla ni 30: Vawiin khan Kolasib District Level Committee on Narcotics Coordination Centre (NCORD) chu an Chairman, Kolasib Bawrhsap Pu John LT Sanga hovin Kolasib DC Conference Hall-ah an ṭhu khawm a. District chhunga ruihhlo dona kawnga hma lakna hrang hrang thlir hovin, hma lak zui zel dan tur an ruahman.

Chairman Pu John LT Sanga chuan sawrkarin ruihhlo dona leh a ngawlveite enkawl zuina lam a ngai pawimawh hle tih sawiin, District level-ah pawh theih tawpa ṭan lak a ṭul thu a sawi a. Ruihhlo chu ram leh hnam hmelma lian tak a nih avangin tha thlah lova do a ṭul a, chumi tur chuan sawrkar department, tlawmngai pawl, kohhran leh mipuite’n thawh hona ṭha neih a pawimawh, a ti a. Ṭhenawm ram leh state-a buaina remchanga laa ruihhlo tawlh an awm ṭhin avangin fimkhur lehzual a ṭul a ni tiin, rinhlelhawm deuhva an hriat chu thuneitute hnena hriattir vat ṭhin turin District mipuite a chah a ni.

He hunah hian Kolasib District Additional Superintendent of Police Pu David J. Byhnadaolai leh Kolasib Sub-Headquarters YMA President Pu Thomas D. Lalengliana te hnen aṭangin ruihhlo do kawnga hma lakna report ngaihthlak a ni a. Kolasib District chhunga ruihhlo lut leh District pal tlanga ruihhlo tawlh veng tur leh tirem tura hma lakna kal mek leh hma lak zui zel dan tur te sawi ho niin, Police, Excise leh YMA te nen hmun rinhlelhawm leh ngaihmawhawm lai deuh dap chhuah beihpui thlak ni se, tih a ni a. Ruihhlo vanga buaite enkawl zuina chungchang leh ṭhalaite'n ruihhlo an khawih loh nana zirna in hrang hranga ruihhlo ṭhat lohzia inzirtirna kalpui chungchang te sawi ho a ni bawk.

Kolasib District Police te chuan kum 2023 chhung khan damdawi chi hrang hrang - heroin (4.709 kg), pseudoephedrine (194 kg) leh methamphetamine (10.5 kg), a zavaia ₹ nuai 578 chuang man hu an man a. Hemi kaihhnawihah hian case 17 ziak lutin, mi 23 an man a. Kuminah heroin gram 824.44, ₹ nuai 23 chuang hu man leh tawhin, case 4-ah mi 7 man an ni.

Nikum chhung khan zu chi hrang hrang ₹ nuai 1,179 man hu manin, case 3 ziah luh a ni a. A neitu mi 3 leh a phurhna lirthei 3 man tel a ni bawk a. YMA Kumpuan Committee chuan duty ṭum 175 an neih aṭangin zu leh damdawi chi hrang hrang eng emaw zat an man bawk.

Kolasib District Police te chuan nikum chhung khan sikul hrang hrang panga - CZ HSS, St John's HSS, Saiphai HS, Kawnpui HS leh Bairabi PS-ah te ruihhlo ṭhat lohzia inzirtirna awareness campaign an buatsaih a ni.

Kolasib District chhungah zu leh damdawi ngawlvei enkawlna home/centre pathum - TNT Khuangpuilam; Jordan Centre, Seṭhawn leh Golgotha Camping Centre, Vairengte te a awm a. He'ngah hian enkawl lai mi 483 (mipa 398 leh hmeichhia 85) awmin, damdawi vanga enkawl mi 348 leh zu vanga enkawl mi 135 an awm a ni.