3527/2024-2025

Dated Hnahthial, the 13th December, 2024: Vawiin chawhnu khan Excise & Narcotics Minister, Pu Lalnghinglova Hmar leh Bialtu MLA, Pu Jeje Lalpekhlua te chuan Hnahthial District chhunga Kohhran hruaitute, tlawmngai pawl hruaitute, MJA member te leh Hnahthial District chhunga Head of office te chu Hnahthial DC Meeting Hall-ah thutkhawmna an neih pui a. Ruihhlo dona kawnga hmalak dan tur an hriat theih nan kalkhawmte hnenah an vei zawngte sawina hun hawngin an rawtna hrang hrangte ngaihthlak a ni a.

Minister, Pu Lalnghinglova Hmar chuan thutkhawmna koh anih chhan chu ruihhlo hluar ta lutuk kan tihziaawm theih dan tur te, sawrkar leh khawtlang te ruihhlo dona kawnga thawh hona tha zawk kan neih theih dan tur te bakah ruihhlo ti lo tura kan inzirtir theih dan tur te anih ber thu a sawi a. Hnahthial chu tun dinhmunah chuan ruihhlo kalkawng chiah ala nih thu sawiin ruihhlo zuar leh ti tak erawh an la tam lutuk lo ni a an hriat thu a sawi a. Thenawm leh hmelhriat ruihhlo zuar, thuneitute hnena report chu hek an ni lo tih mipui ten hre tura a duh thu sawiin ram leh hnam tana hna tangkai thawk an ni zawk a ni tih hre tura a duh thu a sawi a ni.

Ruihhlo tih tanna bulpui ber, a gateway substance chu zuk leh hmuam anih thu sawiin heng ah te hian inhrilhhriatna (awareness) kalpui nasat zual ni se a duh thu a sawi a. Awareness hi thawk leh khata tih huk chi anih loh thu sawiin nitin nunah intuh a ngai a ni a ti a. Chumi tur chuan zirlai naupangte ah bul tanin zirtirtute chuan nitin an zirlaite hnenah tawngkam hnih khat talin ruihhlo that lohna hi lo sawi thin se a duh thu a sawi a. Ruihhlo dona kawnga inzirtirna chu Hnahthial officer leh tlawmngai pawl ten neih ni se a ti bawk a. Police leh Excise lo awm thar turte chu tlawmngai pawl leh midang ten ruihhlo man an neih chuan laklawh nei lovin chu chu ngaih pawimawhah nei zawk se a duh thu sawiin a rang thei ang bera kal nghal thin turin a chah bawk a ni.

YMA, Kohhran, MJA leh officer te hnen atangin ruihhlo dona kawnga rawtna hrang hrangte ngaihthlak a ni a. Ruihhlo zuar leh ti hremna tih nat dan kawng a awm theih leh theih loh te sawi ho niin sikulah inzirtirna kalpui nasat a pawimawhna te sawi a ni a. Police leh Excise ten ruihhlo chak lehzual zawka an do a, a zuar tute an man theih nan Dedicated Fund awm thei se ti a rawtna siam niin chu chuan supply reduction a puih theih dan tur te ngaihthlak a ni a. Hnahthial District chhungah ngei rang zawka dan bawhchhia a ngaih, mi mante chungchang rorelna hmun, Court an mamawhna te sawi chhuah a ni bawk a ni.

Bialtu MLA Pu Jeje Lalpekhlua chuan inkhelhnaah tanrual a pawimawh ang bawkin ruihhlo do kawngah kan za vaiin kan tanrual  a tul a ni a ti a. Naupangte hnenah ruihhlo leh ruihtheihthil hrim hrim that lohna awareness nasa zawka kalpui turin kalkhawm, a bikin Kohhran hruaitute chu a sawm a ni.

Thutkhawmna hi Addl DC, Pu Zothanmawia Khiangte chuan lawmthu sawiina in khar a ni.

Thutkhawmnaah hian Excise & Narcotics Secretary, Pu Lalramsanga Sailo, IRS; Pu Z. Lalhmangaiha, Comissioner, Excise &. Narcotics Department leh SP Pu Shivam Siddarth, SP te chu an tel a ni.