3526/2024-2025

2024 Pawltlak thla ni 13: Vawiin chawhnu khan Zokhuma Memorial Field Haulawngah Vanva Zone Football Association buatsaih MLA Trophy Football Tournament final khelh niin, Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga chuan Khuallian niin a hmanpui.

Pu V. Malsawmtluanga chuan inzirna hmun zawl ṭha ber chu khelmual chhung a ni tiin, sports chu ei zawnna tlak, ṭhalaite tana bawh tham a nih thu a sawi a. Ṭhalaite tan MLA a nih chhungin football-ah hmasawnna a thlen theih nan a bial chhunga Vanva Zone leh Pangzawl Zone te tan kum nga chhunga hman turin MLA fund ni lo, ama mimal sum aṭanga hman turin cheng nuai 10 a dah tih sawiin, zone pahniha khelh turin MLA running trophy chu kum tin khelh a nih tur thu leh zone football association hruaitute nen inbe rawnin a hun chu ruat ṭhin a nih tur thu a sawi a. Ei zawn nana hmang chiah lo tan pawh infiamna chuan kan nun min vawngin, hlawhtling tura tum ruhna leh taimakna min pe a, hei hi a hlu hle a ni, a ti.

MLA Trophy football tournament hmawr bawkna hun hi Vanva Zone Football Association President Pu Lalhmachhuana Ralte chuan a kaihruai a. Khual zahawm, Lunglei District Football Association President Pu Pc. Lalramnghaka pawhin thu a sawi.

Vanva Zone Football Association buatsaih MLA Trophy-ah hian khaw 9 aṭangin team an tel a. Rotluangi Jongte Memorial Team, Mualṭhuam 'N' leh GSA, Kanghmun 'S' te'n final khelin, Rotluangi Jongte Memorial Team, Mualṭhuam 'N' chuan 2-1-a hnehna changin, an champion a ni.