747/2025-2026

Aizawl, the 5th of June, 2025 : Nimin khan Pu Lalnghinglova Hmar, Minister of State, Excise & Narcotics Department chuan Synod Revival Camping Centre (SRCC), Sihphir Neihbawih a ruihhlo ngai te puala Chhanchhuahna Camping neih mek chu a tlawh a, camping buaipuitute nen an inkawm bakah camping kaihhnawih a tul apianga hman turin sum fai a hlan. 

Excise Minister Pu Lalnghinglova Hmar chuan ruihhlo ngaite puala camping buatsaihtute hmalakna fakawm a ti a. “Ruihhlo do kawngah sawrkar leh khawtlangin theihtawp a chhuah chungin, kohhran a tel chuan lian zawk leh awmze nei zawkin hma a lak theih thin a ni,” a ti. Tuna camping boruak atangin ruihhlo ngai chhanchhuah kan mamawh zia a lang chiang hle a, kohhran pawhin thildang thlauhthla chuang lovin helam hawi telh telh se a duh thu a sawi bawk. 

Rev. JC Lalramliana, Synod Revival Committee Director, Rev. F. Lalrinnunga, Synod Revival Committee member leh Upa Lalmuana, Camp Director te’n Excise Minister hi an lo dawngsawng a. 

Camper te chu an chhuahna tur zawnsak vek tum a nih thu leh, an chhuah hnuah pawh inlama tlawh chhuah vek tum a nih thu an sawi a ni. Kar leh Thawhlehni atangin follow up camping neih tum a nih thu an sawi bawk. 

Chhanchhuahna camping-ah hian camper tam laiin mi 1005 an tling a. Synod Revival Camping Centre-ah hian tun dinhmunah mi 120 awm mekin, campers te hi kum 18 leh 67 inkar te an ni.

May ni 5, 2025 khan lutin Vawiin, June 5, 2025 hian an chhuak ang. SRCC bakah hian Youth Recreation Centre, Falkland-ah Chhanchhuahna camping hi kalpui niin mi 112 an awm mek bawk a ni. Camping buatsaihna’n Rs. 40 lakh vel sen tawh a ni. 

Excise Minister hi Pu Z. Lalhmangaiha, Commissioner, Excise & Narcotics Department in a tawiawm a ni.