Vawiin khan Kolasib DC Conference Hall ah kumin Lok Sabha MP inthlan lo awm tur a tana inpuahchahna te thlirho in Expenditure Observer Pu H.Lallean Songate, IRS hoin thutkhawmna neih a ni.

He hunah hian Expenditure Observer chuan inthlanna muanawm leh felfai tak kan neih theihnan ECI in dan a zam te chu Candidate, Party, Sawrkar hnathawk leh mi nawlpui ten kan zawm a pawimawh ani tiin India rama State tam tak aiin Mizoram chu inthlanna kawngah a felfai thin a, hei hi chhawm nunga State dangte entawn tlak khawpa hma kan lak zel a tul a ni a ti bawk.

District Election Officer Pu Zoengsanga chuan inthlan lo awm tura inpuahchana leh hmalakna tlangpuite a tarlang a, inthlan lo awm tur a tan Kolasib District chu a inpeih fel thawkhat tawh tih a tarlang bawk a ni.

He hunah hian inthlan kaihhnawiha Team hrang hrang heng Flying Squad team, Accounting team, Static Surveillance team, Expenditure Monitoring team, Video Viewing team leh a dang te an kalkhawm a, team thenkhat atangin hmalakna te ngaihthlak ho niin zawhna leh chhanna hun hman bawk a ni. Expenditure Observer hian kumin MP inthlan lo awm tur ah hian kolasib, Mamit, Serchhip leh Champhai te a bial a ni.