4307/2023-2024

Dated Serchhip, the 22^nd March, 2024: Vawiin khan Serchhip District bialtu Expenditure Observer Pi Anita Ritesh chuan Serchhip District Election Office tlawhin Lok Sabha Inthlanpui lo awm tura Expenditure Monitoring team member ruat zawng zawng te nen DC Meeting Hall Serchhipah an thukhawm.

Pi Anita Ritesh chuan Mizoram chu ram ralmuang a nih avangin inthlanna pawh felfai leh muanawm takin neih a ni thin a, kumin Lok Sabha inthlanah pawh harsatna engmah a awm loh a beisei thu a sawi a. Inthlanna a duty tura ruat zawng zawng te chu an mawhphurhna tha taka hlenchhuak tura sawmin, ram rawngbawlna pawimawh tak an thawk tih inhriaa Inthlanpui zawhfel hma chu thathlah loa an hna theuh tlin taka thawk turin a sawm a ni. Election chhung hian englai pawhin biak pawh theiha a awm tur thu leh Expenditure Monitoring Team ten harsatna emaw zawhna emaw an neih chuan a inhawn reng thu a sawi a. Chutiang bawkin inthlan zawh fel hma chu inthlan senso viltu tur leh endiktu tura ruat zawng zawng ten chawl lova, a tul hun apianga an tih tur te ti a, an hna theuh te tha taka thawk tura beisei an nih thu a sawi a ni.

Expenditure Observer chuan meeting ah hian team hrang hrang te kawmin Election chhunga an tih tur leh mawhphurhna a sawi pui a. Record mumal taka vawn a tulzia leh candidate leh political party ten therhlo an sem lohna tura Election Commission of India (ECI)-in inkaihhruaina a siam te uluk taka zawm a tulzia a sawi a. Team hrang hrang ten thawhhona tha tak an neih a tul thu a sawi bawk a ni.

Meeting ah hian DEO Pu David Lalthantluanga, Election Expenditure Monitoring Nodal Officer te, Asst. Expenditure Observer te, Accounting Team te, MCMC team te, Video Viewing team te, Flying Squad Team leh Static Surveillance Team te an tel a.  Inthlan chhunga campaign atana sum sen an endik dan chungchang leh therhlo sem a awm lohna tur hma an lak dan te an sawi a ni.