4306/2023-2024

Khawzawl, 22nd March 2024:  Khawvel hmun hrang hrang te rualin vawiin khan World Water Day chu Khawzawlah pawh hman a ni a. Khawzawl Bawrhsap Pu K. Lalrohlua chuan khuallian niin he hun hi a hmanpui. Kumin World Water Day-ah hian ‘Inremna atan Tui’ (Water for Peace) tih chu thupuiah hman a ni.

Khawzawl Electric Venga inkhawm tawi buatsaihah thu sawiin Pu K. Lalrohlua chuan tui harsatna chuan ram, state, khua leh mimal inkarah innghirhona leh indona a thlen fo thin a ni, a ti a. Hei vang hian World Water Day 2024 thupui atan United Nations-in ‘Inremna atan Tui ‘(Water for Peace) an thlang chu inhmeh hle a a hriat thu a sawi bawk a ni.

Khawzawl District Water & Sanitation Committee Chairman ni bawk Pu K. Lalrohlua chuan ramngaw, lui hnar leh lui dung te vawiin atanga enkawl that an nih loh chuan hun lo la awm zel turah tui harsatna a thleng dawn a ni, a ti a. Ramngaw leh tuihna tichereu lo zawnga eizawnna pawh her rem thiam a ngai a ni, a ti bawk.  Mizoram chu ram vannei tak, awlsam taka ramngaw siam theihna ram a nih thu sawiin khuallian chuan vawiina hun hman thupui chu mi zawng zawng thinlungah cham reng se, tui hmanga inremna leh malsawmna thlentu ni theuh turin kalkhawmte chu a chah a ni.

Khawzawl Sub Headquarters YMA President Pu PC Rosiama chuan he hunah hian thusawiin tui harsatna avanga buaina tawk hnem ber tu chu hmeichhia te an ni a, tuihna leh ramngaw humhalh a tul thu ngaithla tura hmeichhia an pungkhawm tam zawk chu a lawmawm hle a ni, a ti. Mitin ten an dikna chanvo an hriat chian ang bawkin, an mawhphurhna pawh an hriat chian a ngaih thu sawiin Pu PC Rosiama chuan khuarel inbuktawk (ecological balance) tibuai lo zawnga chet chu mitin mawhphurhna a ni, a ti a. Hleihluak taka ramngaw leh luidung tih chereu hi a tawpah mihring te bawkin kan tawrh leh thin avangin ramngaw leh luidung humhalh chu mutmawh hnarmawha neih a ngai a ni, a ti bawk.

Pu PC Rosiama chuan tuihna leh luidunga cheng nungcha te humhalh a tul tluk zetin, lui hnar lama ramngaw humhalh that pawh a pawimawh a ni, a ti a. Vantlang tui tlan leh a chhehvel ramngaw te khawtlang enkawlna hnuaia dah a tul tawh a a hriat thu leh ruah tui dahkhawl ngaihpawimawh thar a tul thu a sawi bawk a ni.

He hun hi Pu Liantluanga Chohte, EE, PWD, Khawzawl Watsan Division chuan a kaihruai a. Vawiin inkhawmah hian Khawzawl Watsan hnuaia Village Level Water Supply & Sanitation Committee tuihna humhalh leh faina kawnga hma la tha khua pathum hnenah lawmman hlan a ni a. Chungte chu:

Pakhatna: Khualen

Pahnihna: Tualte

Pathumna: Vanchengpui; te an ni.

World Water Day pual hian zingkarah Govt. Khawzawl College leh PHE Khawzawl Watsan Division ten Rally an lo nei tawh bawk a ni.