Vawiin chawhma dar 10 khan CMO Conference Hall, Serchhip-ah ‘Facility Based New Born Screening (RSBK) Training neih a ni a, Serchhip District chhunga thlan bik Medical Officer leh Health Sub Centre-a nau chhar thin, Health Worker te an tel.
Training hun bul tanna ah Dr. Lalhlunpuii, Nodal Officer RSBK chuan thu sawiin, nausen piang hlim za zela 6 hian natna an nei sa a ngaih an ni a, chungte chu hmuhchhuah thuaia enkawl an nih loh chuan piansualna leh thihna hial thlen thei anih avangin an pian hlimchhawn atangin nausente hi enkawl thuai an ngai a. Nausen enkawl an nihna hmunah an natna hmuhchhuah anih a, an enkawl theih loh chin anih phei chuan hmun changtlung zawkah kal tir thuai thin tur a ni. Hei hian a tum pawimawh tak pakhat chu, nausen thi zat tih tlem a ni a ti bawk. RSBK Team te hi Anganwadi Centre leh zirna in hrang hrangah te kal kualin naupang harsatna nei an awm em tih an zawng thin a ni, a ti.
Ministry of Health & Family Welfare, National Health Mission hnuaiah RSBK team te hian naupang hriselna endik leh an natna hmuh thuaina (Child Health Screening and Early Intervention Services) hi an kalpui reng a, naupang pianghlim atang kum 18 inkarah piansualna te, natna nei te, tlakchham nei emaw, eng emaw taksa lam harsatna neih avanga piansualna emaw thang tha theilo te zawn chhuah a, a enkawlna hmun dik taka enkawl tura kal tir vat tura ruahmanna siam thin a ni. Hemi atan hian District tinah RSBK Team awmin, AYUSH Doctor 3, Dental Surgeon 1 leh Health Worker 2 zel an awm a, District chhunga khua zawng zawngah Anganwadi Centre ah leh School ah te kal in enkawl ngai an awm em tih zawng chhuakin a enkawlna hmun tur an kawhhmuh thin a ni.
Vawiinah Training ah hian Primary Health Centre a, Medical Officer te. Community Health Centre a Medical Officer te leh Sub Centre hrang hranga Health Worker nau chhar thinte an tel a, Dr. K. Lallawmzuala, MD, District Hospital, Serchhip leh Dr. Lalhlunpuii, Nodal Officer in zirtirna an pe a, Lianthangpuii Fanai, DEIC Manager chuan RSBK chungchang sawifiahna hun a nei bawk a ni.
