Faina Hapta ‘Cleanliness Week 2011’ kharna inkhawm chu vawiin chawhma dar 12 khan DCs Conference Hall, Saiha ah neih a ni.

He Faina Hapta 2011 kharna inkhawm hi Pu Benjamin Azyu, Assistant L.A.O., MADC Saiha chuan a kaihruai a. Pu Kunal, IAS, District Bawrhsap cu khuallian a ni. District chhunga he Faina Hapta hman dan report kimchang Pu V. Lalengmawia SDO (S) chuan a pek hnuah thu sawiin khuallian chuan faina hi Pathian kan an teuhna ber a ni a, mitin ten faina kawngah hian mawhphurhna sang tak kan nei a ni, tiin he Faina Hapta kan hman chhung chauh a kan in leh a velte vawng fai mai lovin englai pawhin faina hi kan mamawh pawimawh tak a ni, a ti a. Khawpui chhung enkawl thianghlim kawngah pawh a chhunga cheng ten mawh kan phur lian hle a ni, a ti bawk.

Faina Hapta hman chhung hian Saiha khawpui chhungah tehna hrang hrang hmangin faina kawngah inelna buatsaih a ni a. Pakhatna atanga pathumna thleng lawmman siamsak an ni. Faina lam hawi chanchinbu-a thu ziak tha berah Maraland chanchinbu chu thlan a ni a. High School fai berah New Colony High School chu thlan niin, Middle School fai berah Lorrain English School chu thlan a ni bawk. Primary School fai ber ah Meisatla Primary School chu thlan a ni a,  Office fai berah DRDA office, Saiha chu thlanchhuah a ni. Restaurant fai ber atan DRDA canteen chu thlan a ni bawk.

Village Council area fai ber ah Siahatla I chu thlan a ni bawk. Office chhunga meizuk tlemna berah District Industries Centre, Saiha chu thlanchhuah a ni. Heng tehna hrang hrang atanga fai ber thlan chhuah te hnenah hian khuallian chuan lawmman certificate leh tangkafai a hlan nghal a ni. Programme karlakah zaithiamte zai ngaihthlak a ni a, chairman in kalkhawmte hnenah lawmthu sawina a neih hnuah he Faina Hapta kharna inkhawm hi tih tawp a ni.