Vawiin khan Pu Zodintluanga  UD & PA Minister chuan Faina Hapta kharna inkhawm leh Hapta puala inelna hrang hrang lawmman semna hun Synod Conference Centre a neih chu khuallian niin a hmanpui. Kharna inkhawm hi Pu R L Rinawma, Principal Secretary UD & PA chuan kaihruai a,  Pu B. Vanhlira Senior Sanitation Officer in Faina Hapta hman dan Report a pe  bawk a ni.  AMC Chairman Pu C T Zakhuma, AMC CEO Pu Nghaklianmawia, AMC Councillors leh Veng hrang hrang Local Council hruaitute hi kharna inkhawm ah hian an tel a ni.

Pu Zodintluanga chuan nikum October lam khan Faina Kum puan a lo nih tawh thu sawiin Faina Hapta hman hi chu ramchhung hmun dang ruala hman a nih ve thu a sawi. Minister chuan Faina Kum 2010 -11 chunga UD & PA Department chuan Aizawl khawpui veng hrang hrangte kumtluanin faina lama an hmalak dan leh an hnathawh dan te thlirin an en reng a, chuta tang chuan Veng Fai ber pathum thlanchhuah a nih thu a sawi. Minister chuan Hapta hman hi chu Faina lama inzitirna leh inhrilhhriatna hun (education and awareness) atan hman an ni a ti.

Pu Zodintluanga chuan  zirlai, naupang leh thalai ten Faina pawimawh zia leh a tulna te hria in awareness an neih that tawh thu sawiin puitling zawkte inzirtir ngai leh in enlet a tul thu a sawi. Sorkar leh mipui tanrualna avangin Aizawl khawpui chu a fai tawh thu sawiin hei hi duhtawk mai lova hei aia bawlhlawh paih leh sawngbawl dan changkang zawk neih theih nan Sorkar-in hma a lak mek thu a sawi bawk a ni.

Minister hian Faina Kum 2010-11 chhunga Aizawl khawpui a Veng fai ber pathum te leh Faina Hapta 2011 puala Essay Writing Competion leh Slogan Writing Competion ti tha te hnenah lawmman a hlan nghal bawk a ni.

Aizawl khawpuia Veng fai ber lawmman chu Sawrtuichun in an la a, pahnihna leh pathumna te Laipuitlang leh Ramthar Veng te an ni. Pakhatna hian pawisa fai Rs. 30,000; pahnihna in Rs. 20,000; pathumna in Rs. 10,000 leh thuziak an keng tel theuh bawk a ni.

Aizawl khawpui chhunga High School leh Higher Secondary zirlai te tana Essay Writing Competion ‘Aizawl khawpui faina atana sorkar leh mipuite mawhphurna’ tih thupui ziaka lawmman late chu – pakhatna Lalchunglura Class IX Divine Intervention School, pahnihna Hmingsangzuali Class XII Synod HSS leh pathumna P C Larinawma Durtlang HSS te an ni. Slogan Writing lawmman late chu – pakhatna Linda Lalrinchanni St. Paul’s HSS (Ka ram Fina Kan Faina); pahnihna Dinai Chinzah Home Mission School (Don’t Be Dumb, To Dump The Waste) leh pathumna John H Lalhmingthanga, Govt. Aizawl College (Min Chhar La, Ka Bawmah Min paih Rawh) te an ni.