Vawiin chawhnu khan Chief Secretary's Conference Hall-ah Pu Parameswaran Iyer, Secretary, Ministry of Drinking Water & Sanitation(DWS) leh Mizoram Sawrkar Official-te chuan faina kawnga Mizoram sawrkar hmalakna te thlirletna leh sawihona hun an hmang.

Mizoram Chief Secretary Pu Lalmalsawma'n meeting hi a kaihruai a. Pu V.Lalremthanga, Secretary, PHED, Er. Lalmuanzova , E-in-C, PHED, District Bawrhsap te leh an aiawhtute bakah PHED Department hotulian ten Mizoram sawrkar ai an awh a; Joint Secretary Pu Arun Baroka leh Official dang ten DWS Secretary hi an rawn tawiawm thung.

An lo kalchhan leh DWS official ten Mizoram District hrang hrang a sanitation programme kalpui dan te an enfiah chung chang tarlang hmasa in Pu Parameswaran Iyer, Secretary, DWS chuan Mizoram sawrkar hmalakna chu a chhuanawm thu a sawi a. India ram state dang te entawn atana thil tha tam tak Mizoram sawrkar hmalakna hnuaiah a hmuh avanga a lawm thu a tarlang. Mizoram in Swacch Bharat Mission hmalakna awm hma atang tawha thianghlimna kawngah theihtawp an lo chhuah thin a vangin Mizoram mipui te hnenah faina kawnga zirtirna pek belh a harsat loh tur thu a sawi a. District tina chhungkaw tin ten anmahni puala ekin thianghlim an neih vek thuai a beisei thu a tarlang a. Ekin sak tanpuina chu sakna sum nei theilo te tanpuina a nih thu a sawi a. Ek in thianghlim leh phui tha( Sanitary Toilet) sa thei leh sakna sum nei, dinhmun ziaawm deuh zawkte chu beneficiary list-ah awm beisei lova anmahni theihna zawna hma la tur leh hriselna kawnga midang te chawkphurtu ni turin a chah a. Open Defecation Free state chu Sawrkar laipuiin tanpuina sum pek kawngah a duhsak bik dawn bakah lawmman a siam sak a tum thu a sawi a ni.

Swacch Bharat Mission hnuaia Sanitation hmalkna Report in tarlan dan chuan : Champhai District chiah, daikala zun leh ek thiar awm tawh lohna,Open Defecation Free(ODF) District a la ni mek a. Hetih lai hian District dang 3 pawh ODF ah puan thuai theih turin hma an sawn a tih tarlan niin heng distrct 3-a Bawrhsap te pawh in ODF ah puan an nih har tawh loh tur thu an sawi a ni. Tun dinhmunah, Aizawl District ah chhungkaw 3205, Kolasib District ah Chhungkaw 1225, Lawngtlai District ah chhungkaw 12,072, Lunglei District ah chhungkaw 5996, Mamit District ah chhungkaw 3519, Saiha District ah chhungkaw 3307 leh Serchhip ah chhungkaw 1390 ten ek in pangai(Sanitary toilet) la nei lovin Mizoram pumpui ah ek in sak hmabak chhungkaw 30, 714 an awm a ni.