No.2362/2021-2022

Aizawl, the 28th September 2021: UD&PA chuan India ram zalenna in kum 75-na a tlin hun den chhena hmalakna Azadi Ka Amrit Mahotsav a kalpui mek leh kan hma lawk – October 2 atanga October 8, 2021 thlenga hman tur Faina Hapta vawi 45-na chungchangah nimin chawhnu khan UD&PA Director’s Meeting Hall-ah meeting neih a ni a. He hunah hian Pu H.Lianzela, Director, UD & PA chuan Faina kawnga hmasawnna kawngah chak zawka ke pen a nih theih nan Chanchinbumite, Social Media Influencer leh mimal anga thahnemngai apiang te thawhpuiah a sawm.

Pu H.Lianzela, Director, UD & PA chuan Chanchinbuah te Azadi Ka Amrit Mahotsav leh Faina chungchanga mipui zirtirna tha tak tak ziah a nih theih nan Chanchinbumite thawhpuiah a sawm a. Mizoram pum huapin Faina leh Thianghlimna kawnga mipuite zirtirna chhawpchhuak tha zual Chanchinbu pathum hnenah lawmman hlan a ni dawn a. Mipui zirtirna atan hian Article, Editorial leh Au Hla (Slogan) te endik a ni dawn a ni a ti.

Heng bakah hian Electronic Media leh Social Media kaltlanga mipui zirtirna te bakah Mizoramin hmasawnna a neih te pholanna pawh kalpui tum a ni a ti bawk. District Level-ah Azadi Ka Amrit Mahotsav huanga hmalakna te tha taka chhinchhiah a nih theih nan DIPRO leh DUDO te chu thawkhoa Video Clip te siam a, documentation tha taka buatsaih tura mawhphurna pek an ni bawk a ni.

Kumdanga lo kalpui tawh thin angin India ram Khawpui fai endikna lian ber, Swachh Survekshan 2022 atana inpuahchahna atan October ni 2 atanga tanin November ni 30, 2021 thlengin UD&PA chuan Khawpui Fai leh Thianghlim a thlangchhuak leh dawn a. Urban Town 28-ah te mi thiam rual te tir chhuakin anni hian Faina kawnga hmalakna te a bikin Open Defecation Free Plus, Bawlhhlawh thliar hran, Single Use Plastic hman tlem leh tih tlem bakah Vantlang inthiarna vawn thianghlim kawngah te Mizoram khawpuite an en dik leh dawn a ni.

Azadi Ka Amrit Mahotsav leh Cleanliness Week puala awareness campaign kalpui dan chungchang sawihonaah hian Pu Malsawmzuala, Joint Director, UD&PA, Pu Malsawmsanga, Dy Director, I&PR, Pi Lalremruati, Dy Director, UD&PA, Pu R.Lalfakzuala, Research Officer, UD&PA leh SBM – U Team, UD&PA te an tel a ni.