2640/2023-2024

Aizawl, 04.11.2023: General Election lo awm tur atana inbuatsaihna kal mekah Aizawl District Election Officer Pi Nazuk Kumar, Aizawl DC ni bawk chuan nizan (03.11.2023) dar 7:00 pm khan Falkawn Community Hall ah khawtlang mipuite hnena vote thlak chungchanga inhrilhhriatna hun pawimawh a hmang. He inkhawm hi SVEEP (Systematic Voters’ Education and Electoral Participation) hmalakna a buatsaih a ni.

DC Pi Nazuk Kumar chuan vote thlaktute’n ram hmawsawnna leh danglamna tha zawk siam chungchanga mawhphurhna pawimawh tak an neih thu a sawi a. Mipuiin an hruaitu tur thlanna ah an thu engmah an neih lohna atanga mipui rorelna ram a siam tura mi tam takin an nunna hial te hlan a nasa thaka an lo beih dan te hre rengin, vote thlak rual tawh phawt chu tupawh ni ila, kan vote a hlut thu a sawi a. DC chuan vote a hlut em avangin mahni chhia leh tha hriatna hmangin, midang duh dan nilo, mahni duhna ngei ah vote thlak turin kalkhawmte chu a sawm a. Vote thlak chungchanga harsatna nei an awm chuan an harsatna te thlen hreh lo turin leh puih a inhuam reng thu a sawi a ni.

He inkhawm hi Pi C. Laltleipuii, Nodal Officer, SVEEP Aizawl District chuan kaihruaiin SVEEP thil tum tlangpuite sawifiahna a nei bawk a. Vote percentage tih san mai piah lama vote quality tha siam chu ngaihpawimawh a nih thu a sawi.  Falkawn Branch President Pu Zomuankima hnen atangin thusawi  ngaihthlak  a ni bawk a. Pi Emily Lalrinpuii, SCCT Convener chuan lawmthu sawiin hun a khar  a ni.

SVEEP Aizawl District chuan inthlanpui atan hian kawng hrang hrangin voter te zingah kawng hrang hrangin inhrilhriatna leh inzirtirna a kalpui tawh a. ECI in a ngaihpawimawh voter group hrang hrang – thlalai, kum upa, hmeichhe voter leh Persons with Disabilities te zingah kawng hrang hrangin hma a la a.  Inthlan hmasa lama vote tla percentage a tlemna hmunah te pawh awareness programme buatsaih mai bakah zirchianna te neih a ni.