Fall Army Worm (FAW) hi India ramah nikum 2018 khan State thenkhatah hmuh a ni a, thlai ei chhetu ber chu pangang a ni a, a puitling chu phengphehlep a ni. A puitling hi ni khatah 100 Kms laia thui a thlawk thei a, awm duhna leh kal duhna hmun bik a nei chuang lova, inven lawk ngawt dan a awm lo. State hrang hranga thleng thei a nih thu Plant Protection Adviser, Government of India atangin Agriculture Department chuan hriattirna a dawn avangin lo hal hma, February thla daih tawh khan DAO zawng zawngte inring lawk turin Department hotuten hriattir an ti chhuak tawh a ni. DAO te chuan vaimim to tirh atangin endik hna an thawk nghal a, April ni 8, 2019 khan Lunglei District-ah Fall Army Worm (FAW) awm thu hi hriat a ni ta nghe nghe a ni.
Lunglei District-ah hmuh a nih tak avang hian DAO te chu inralring lehzual tura hnattir an ni a, District tina Field Staff zawng zawng e chu a pawl pawla insem darhin an vak chhuak a, a theih anga tam an tuam nghal a ni. Hetianga a nawlpuia feh chhuah thin a nih tak avang hian a bika hma la tur leh a tul anga ruahmanna siam turin April ni 26, 2019 khan Rapid Response Team din a ni ta a. Rapid Response Team din hma pawh hian District tinah Squad indinin a tul ang apiangah hma lak nghal a ni bawk.
Fall Army Worm (FAW) hian vaimim bakah thlai chi hrang hrang a khawih thei a, vaimim hi awm ta lo se eng thlai ber nge a khawih ang tih sawi lawk mai theih a ni lo. Fall Army Worm (FAW) tirem tur leh hmalak zel dan tur chungchangah Central Integrated Pest Management Centre (CIPMC), Aizawl leh Directorate of Plant Protection Quarantine & Storage (DPPQ&S), Govt of India lam nen inrawn khawmin hma lak mek zel a ni a, tanpuina awm thei ang ang pawh Central Sawrkar-ah dil a ni.
Fall Army Worm (FAW) chungchanga hmalakna leh a beih zel dan tur chungchang Agriculture Department hotuten Agriculture Minister leh Chief Minister te an sawipui a. Pesticides leh hmanruate loneitute hnenah a thlawna sem niin mamawhtute dawr theih turin Office holiday-ah pawh Directorate, District leh Sub-Division Office te hawn thin a ni.
