Nimin khan Tourism Minister Pu S. Hiato chuan Farkawn a Tourist Lodge leh Zokhawthar-a Tourist Building sak belh te chu a hawng. Pu S. Hiato hi Parliamentary Secretary Pu H. Zothangliana’n a tawiawm bakah Lai Autonomous District Council atangin Pu Lalneihkhuma EM(Education) leh Pu Chuanglura Adviser to CEM ten an tawiawm a, Mara Autonomous District Council Pu H. Sohio leh K. Beisa Ex. EM ve ve; Pi A. Daozu Ex MDC leh Pu B. Dawpho, Editor Saiha Post ten an tawiawm bawk a. Sorkar hnathawk tawiawmtu te chu PHE Department Engineering-in-Chief Pu R. Lalfanliana; SE Pu Chawnghnuna leh PHE Department a Officer dangte bakah Tourism Director Pu Vabeiha Hlychho; PWD Senior EE Pu Lalnghinglova leh PWD Officer te anni.

Farkawn Tourist Lodge hawnna Inkhawm hi nimin zing lam khan Tourist Lodge Complex tual ah neih niin Tourism Director Pu Vabeiha Hlychho in a kaihruai a. Hawnna inkhawm ah hian Pu S. Hiato chuan thusawiin Mizoram-ah pipu te sulhnu tamna ber leh Mizo History ah pawh hmun pawimawh tak tak te awmna chhehvel - Farkawn a Tourist Lodge hawn a ni ta chu lawmawm a ti a. Heng thil hlu leh Mizoram-a ram ngaw te, sik leh sa nuam te, boruak muanawm leh ralmuanna te leh Mizo nun zemawi te hi khualzin hip thei tu thil tha tak a ni a ti. Khualzin te hian nasa takin ram sum pai dinhmun an siamtha thei a tiin chumi atan chuan khual thleng tura inpuahchah leh inbuatsaih a tul bakah dawnsawn thiam a pawimawh thu a sawi lang bawk. Lodge hi Farkawn tan malsawmnna a nih ngei a beisei thusawiin Lodge leh a hmun hma te humhalh leh enkawl kawngah khaw mipuite a ngen nghal bawk. Sorkar hmalakna thenkhat a bikin tui thianghlim mipuite hnenah pek chhungchangah leh leihnuai hausakna laichhuah kawnga ruahmanna te chu a thusawi ah hian Pu S. Hiato hian a tarlang tel bawk a ni .

He hunah thusawitu dang Parliamentary Secretary Pu H. Zothangliana chuan Farkawn khaw mipuite chu thing leh mau humhalh kawnga an hmalakna te chu entawntlak a tih thu sawiin pipu te sulhnu a tam avangin Farkawn hian Zofate thinlungah dinhmun sang tak a chang a ni a ti a. Mizote hi khual chhawnah kan fel thawkhat a mahse hmasawn zel turin kan in zir chho ve zel a pawimawh a ni a ti a- Parliamentary Secretary chuan khualzin hip a pawimawh rualin mipui mimir in Tourism an chhawr tangkai thiam a tul a tiin Souvenir leh thil dang dang te chawpchhuak thiam turin a chah bawk.

Farkawn Tourist Lodge hawn thar tak ah hian Dormitory Block leh Tourist Facility bakah khualzin thlenna Cottage pathum (room paruk, double bedded vek) a awm a. Dormitory Block leh Tourist Facility zau zawng hi square metre 280 niin a sak nan leh a hmun hma te cheibawl nan hian Rs. 44,86,000 senral a ni a, a satu contractor chu R. Ramngaihawma a ni. Cottage pathum belhkhawm zau zawng chu square metre 225 a niin a sak nan leh a hmun hma te cheibawl nan hian Rs. 79,55,000 sen a ni.

Nimin tlai a Zokhawthar Tourist Lodge Building thar hawnna inkhawm hi Lodge Conference Hall thar ah neih niin inkhawm hi Pi B. Sairengpuii, Secretary Tourism Department in a kaihruai a. Hawnna inkhawm ah hian Tourism Minister Pu S. Hiato chuan Myanmar leh India insumdawn tawnna hmun Zokhawthar hi hmun pawimawh tak a ni tiin kawng tin rengah Sorkar laipui leh State sorkar pawhin a cheibawl leh helai hmun tih changtlun nan ruahmanna hrang hrang a kalpui mek leh kalpui zel thu a tarlang a. Ram dangmi lakah Mizote hmel lanna anih avang leh hun kal chho zelah he hmun hi hmun pawimawh tak mai a nih dawn avangin a khaw mipuite mawhphurhna chu a sang a tiin Customs, Assam Rifles leh Police te nen thawhhona tha tak an neih zel atul thu a sawi.

Thusawitu dang Parliamentary Secretary Pu H. Zothangliana chuan India leh Myanmar sorkar inlaichinna tha chho zel chu lawmawm tiin insumdawn tawnna lama Mizoram atanga thawnchhuah chu hriat tham a awm lova chuvangin Mizoram atanga awmze neia thil thawnchhuah lamah ngaihtuahna kan sen a tul thu a sawi.

Zokhawthar Tourist building hawn thar hi chawng hnih niin a chawngkhatna ah hian khualzin thlenna Room paruk(mi 15 len theihna) a awm a, a zau zawng chu square metre 280.1 a ni a. A chawnghnihna ah hian Conference Hall awmin a zau zawng chu square metre 230 a ni a, a sak nan leh leh a cheibawl nan Rs. 78,74,000 senral niin a satu contractor chu R. Vanlalrova a ni.

Nimin zing Farkawn an pan hma in Minister leh Parliamentary Secretary te hian Khawbung-a Hla Kungpui Mual an tlawh a, khawtlang hruaitute nen inkawmhona hun tha tak an nei a. Kal kawnga Vaphai khua pawh tlawh in khawtlang hruaitute nen inkawmhona hun an nei bawk a ni. Tukin zing khan Rih Dil an tlawh a, chawhnu lamah Pu S. Hiato hi Hnahlan Tourist Lodge hawng tura beisei a ni.