273/2023-2024

Aizawl The 1st May 2023: Vawiin khan Environment, Forest & Climate Change Minister Pu TJ Lalnuntluanga kaihhruiana hnuaiah State Level Sub-Committee on Green Mizoram chu Chief Wildlife Warden’s Conference Hall, MINECO-ah an thukhawm a. Nikuma ‘Green Mizoram Day’ hman dan thlirtletna leh kumina awmze nei leh hlawhtling zawka hman dan tur sawiho a ni.

EF&CC Minister chuan ramngaw humhalh leh venhim a pawimawh hle a, Green Mizoram Day hman thin chuan mipuiah rah tha a chhuah zel a beisei thu a sawi a. Mizoram thing leh mau, nungcha humhalh a tihchangtlun kawngah mi thahnemngai tak tak an pungchho zel nia a hriat thu sawiin, lawmawm a ti hle a ni. Thing leh maute hi mihring mamawh chi hrang hrang petu a nih avangin duat taka enkawl hi Forest Deparment kutah dah mai lovin mitin mawhphurna a ni tih hria a, theihtawp chhuah tan tlan a ngai a ni,a ti.

State Level Sub-Committee Chairman ni bawk Pu TJ Lalnuntluanga chuan khawvel sik leh sa danglam (climate change) avangin harsatna khawvel pumin a tawk mek a, Mizoram ngei pawhin harsatna tam tak a tawk a, hei hi ramngaw tih chereu nasat vang niin harsatna lian zawk tawk lo tura ramngaw humhalh a ngai takzet tawh a ni a ti. Mipuite hnena zirtirna tha zawk thlen a nih theih nan kumina Green Mizoram Day hman tur pawh awmze nei taka duan a ngaih thu sawiin, State Level Sub-Committee on Green Mizoram chuan ngaihtuahna thar neih a tul a, mipuite thawhpuina leh tawiawna tha a ngen nghal bawk a ni.

Vawiin thukhawmah hian hmalakna tur hrang hrang an duan tlangpuite chu :
Kumin Green Mizoram Day 2023 thupui atan ‘Thingphun ila, enkawl zui ang u' (Plant a tree and keep it save) tih vuah a ni a. State Level-ah chuan Green Mizoram Day programme hman tanna atan 9th June, 2023 ruat niin a hmun atan Sihphir (Sakwrhmuituai tlang) thlan niin hemi Ni-a Khuallian atan Chief Minister chu beisei a ni bawk. Kum kaltawhah thingtiak phun thinte chu a tet deuh thin avangin duh angin a nung khawchhuak zo lo fo a, chuvangin a liansa deuh phun tawh nise tiin an rel bawk. Thingtiak phunte dam khawchhuah that nan, he Ni puala thingtiak la zawng zawngin an thingphunte an enkawl zui ngei ang tih intiamkamna nena pekchhuah tum tawh a ni a, an thingphun nun zat report pawh thehlut leh tura beisei an ni tawh dawn a ni. State level leh District level-a kangmei veng tha district leh khua lawmman pek thin chu chhunzawm nise tih niin Aizawl District bikah ‘video clip’ hmanga inelna neih chu phalsak a ni bawk. Green Mizoram Award chu pekchhuah tan tura rel niin, mimal leh pawl hnena pek chhuah tur a ruahman a ni a, Award dawng thei tura ‘Nomination’ thehluh dan leh mipui hnena puangzar hna chu Forest Deparment-te kutah dah a ni. Kum dang a tih thin angin Green Mizoram Day puala ‘talk show’ chu buatsaih leh nise, chanchinbu leh media dangah te uar zawka puandarh tura hmalak nise tiin an rel bawk a ni.

Vawiin State Level Sub-Committee on Green Mizoram thutkhawmnaah hian Pi Kamal Preet, APCCF (Admin) chuan member kalte lawmna thu a sawi a, Pu R.S. Sinha, APCCF (FC) chuan thutkhawm chhan sawiin Pu Laltlanhlua Zathang, DFO, Aizawl chuan lawmthu sawiin hun hnung a khar a ni.

'Green Mizoram Day' hi kum 1999 atangin hman tan niin  kum tin June ni 11-ah hman thin a ni a. Nikum Green Mizoram Day pual khan  thingtiak 19,261 phun a nih bakah thingtiak 1,18,540 semchhuah a ni.