274/2023-2024

Aizawl, 1st May, 2023: Vawiin atang hian Zoram Medical College atanga MBBS zirchhuak zirlai 68 te bakah Foreign atanga zirchhuak zirlai 6 te chuan ZMC-ah Internship an tan dawn a. He mi puala Internship Orientation Programme neih chu Health Minister Dr R. Lalthangliana chuan khuallian niin a hmanpui.

ZMC Lecture Hall-a hun hmanah hian Health Minister chuan ZMC zirlai ten Internship an tan thei tur chu thil chhinchhiahtlak tak, Mizoramin mellung kan phun thar pawimawh tak a ni, a ti a. Hripui len nasat laia Dedicated Covid Hospital-a ZMC puan a nih avanga zirlaite harsatna tawh pawhin kian lam a pan mek chu lawmawm a tih thu sawiin, ZMC-a PG Course hawn a nih theih nan leh India rama Medical College tha ber pawl a nih theih nan a tan lak puiah kalkhawmte chu a sawm nghal bawk a ni.

Kum zabi sawmhnih leh pakhatna chu tumruhna leh chhelna hmanga hmachhawn ngai a nih thu sawiin Minister chuan zirlaite chu vawiina an thlen chin duhtawk mai lova kal zel turin a chah a. Minister chuan Mizoramin Doctor tam tak a mamawh thu sawiin Post Graduate mai ni lo, Super Speciality thlenga zir tum turin zirlaite chu a fuih bawk.

Dr R. Lalthangliana chuan he hunah hian Health Department hnuaia hmalakna leh hmachhawp hrang hrangte tarlangin ZMC-a khum ( General bed) 145 vel awm thin chu khum 432-a awm tawh thu leh khum 500-a hlankai thuai a beiseiawm thu a tarlang a. ICU khum 13 awmna chu khum 50 chuang awmna a hlankai a nih tak thu te, mi 60 awm theihna tur Intern Hostel chu peihfel thuai a nih tur thu te, cheng vaibelchhe 10 ve ve senna turin ZMC Boys & Girls Hostel sak mek anih thu te, Cabin 52 hawn mai theih anih tawh thu te, Cardiology Department tihchangtlun nan Indian Council of Medical Research-in cheng vaibelchhe 1.02 an rawn pek thu te, LV Prasad Eye Care Institute bakah National Institute for Locomotor Disabilites-te nen thawhhona tha zawk neih tum a nih thu te a tarlang bawk a ni.

ZMC-a internship neiturte hian May ni 3, 2023 (nilaini) thleng orientation programme hi an nei ang a, internship hi kum khat chhung neih tur niin April ni 30, 2024 ah an zo ang.

Vawii hun hi Zoram Medical College Dean Dr Swati M. Paki chuan a kaihruai a, Director Dr John Zohmingthanga’n inlawmna thu sawiin, Registrar Dr Jane L. Ralte chuan lawmthu sawina hun  a hmang bawk a ni.