734/2023-2024

Aizawl The 9th June 2023: Food Civil Supplies and Consumer Affairs (FCS & CA) Minister Pu K. Lalrinliana chuan vawiin khan MINECO-ah Controller of Legal Metrology office building thar cheng nuai 125 senga sak chu khuallian niin a hawng a, FCS & CA Secretary Pi Teresa Vanlalhruaii chuan he hun hi a kaihruai a ni.

Minister Pu K Lalrinliana chuan consumers-te dikna chanvo humhalhtu Legal Metrology in hmasawnna thar neiin bungthar an kai ta chu a lawmpui thu a sawi a, thawktute inpekna rah a ni tiin chhuanawm a tih thu a sawi.

Khuallian chuan FCS & CA hnuaia Weights & Measures ni thin tuna Legal Metrology ni ta chu sawrkar laipui pawhin a ngai pawimawh hle a ti a, thawktute pawhin mipui rawngbawltu an nihna hre reng tur leh rinawm tak leh taima taka thawk chhunzawm zel turin a fuih a, an khawl leh hmanraw neih bakah an thiamna leh theihnate chu nasa lehzual a hmang tangkai turin a chah bawk.

Minister chuan mipuite dikna chanvo humhalh tlat a pawimawh hle a ti a, an dikna chanvo hrilhhriatna kawngah pawh nasa lehzuala awareness pek a pawimawh thu sawi bawkin consumers-te hamthatna tur ngaituah ran a bukna diklo hmang thin te chhui zel turin a chah bawk a ni. Pu K Lalrinliana chuan mipuite pawh rilru ngaituahna hman thiam a ngai takzet a ni, a ti a. Mizo hminga hnamdang sumdawng tir mai duhte an awm thin thu tarlangin pawi a tih thu a sawi bawk. In sakna hmanrua leh bungrua quality tha leh tlo a pawimawh thu sawiin Minister chuan mipuite himna chu ngaih pawimawh ber fo a tul a ti a, lirnghing leh thlipui do zo, tlo leh fei tha chauh zawrh ni se tiin office building thar hawn tak chu mipuite tan malsawmna a nih theih nan duhsakna a hlan nghal a ni.

Pisa thar hawnna inkhawm-ah hian Pu P.C. Vanlalliana chuan hunserh a hmang a, Controller, Legal Metrology Dr. Andrew H. Vanlaldika’n technical report pein; Joint Controller, Legal Metrology Pu Laldawngliana chuan lawmthu sawiin hun a khar a ni.

Vawiina FCS & CA (Legal Metrology) building thar, MINECO-a hawn tak hi Ministry of Consumer Affairs, Government of India scheme pakhat, "Strengthening Legal Metrology Infrastructure of States & UTs" hnuaia 100% central funding cheng nuai 125 hmanga sak a ni a, Implementating Agency chu FCS & CA niin plinth area chu 6000 sq. ft (approx.) a ni.

Legal Metrology building thar hi vertical extension tih theih tura ruahman a ni a. A building-ah hian Joint Controller hovin Aizawla staff awm zawng zawng mi 27 chu leng vek thei tura ruahman a ni. Floor thum awmin a chung berah Establishment branch, Joint Controller, Deputy Controller leh Assistant Controller (Admin) room awmin a hnuai chiah floor-ah Enforcement staff room, inspecting staff leh Assistant Controller (Enf) room a awm a, a hnuai berah chowkider quarters tur ruahman a ni. A building sak hna hi Phase thumah thenin Department-in an thawk a, ni 20 April 2021 ah thawk tanin ni 14 December 2021 khan thawh zawh a ni. A floor hnuai ber hi departmental minor works cheng nuai 15.5 hmanga thawh a ni a, ni 11 May 2023 khan zawh fel a ni.

He building sakna tur hi MINECO ah dil a ni a, Sept ni-4 2020 khan tuna a hmun hi neih a ni . Hetah hian laboratory pahnih chu a inkawpa sak turin ruahman a ni a. Chutih rual chuan Controller of Legal Metrology office, Hunthar veng a mi chu office hmun atana a remchan loh avangin laboratory chu sawn thlak nise, tuna building sak tharah hian Controller of Legal Metrology office chu sawn chhoh nise tiin ruahmanna siam a ni a, sawrkar pawmpuina pawh hmuh tawh a ni.