735/2023-2024

Dated Serchhip, the 9th June, 2023: Mizoram State Level Green Mizoram Committee in ruahmanna a siam angin vawiin khan Serchhipah Green Mizoram Day, 2023 hman a ni a. A hawnna inkhawm DC Conference a buatsaih a nih hnuah sawrkar department hrang hrang leh tlawmngaipawlten Khawtetlangah thing phun hnatlang (Ceremonial Mass Planting) an nei zui.

A hawnna inkhawmah hian Pi Nazuk Kumar, IAS, Bawrhsap chu khuallian a ni a. Khuallian chuan, kan ram mawi tak vawnghim reng tur leh a chhunga cheng mipuite mamawh tinreng a phuhruk zel theih nan ramngaw te, nungchate, kan lui leh tuihnate kan humhalh a tul em em a. Chutiang lama kan thanharh zel theih nan Green Mizoram Day hi a tangkai hle a ni. He ni hi kan rilru min tithartu atan i hmang tlat ang u. Kan ramngawte kan humhim theih nan kan farming system te pawh kan thlak chhoh a tul a, kan thlak mek zel bawk a, khuarei daih tur hmasawnna hmalakna (sustainable development) lamah pawh kan thangharh chho ve zel bawk a, a lawmawm hle a ni. Vawiina loh theih lohva thing leh mau kan tihchhiatte pawh hi a rulhna tawk thing leh mau thar kan phun zela, kan dinhmun tichhe zel lo zawnga kan kal thiam a pawimawh. Keimahni ngei hi he ram venghimtu leh kan tu leh fa lo awm zel turte tana chenna tlaka buatsaihtu tur kan nih hi i hrereng ang u, tiin kalkhawmte a sawm a ni.

He hunah hian Dr. Lalremsiami Hrahsel, Asst. Professor, Govt. Serchhip College chuan “Ramngaw (environment) humhalh tura kan mawhphurhna” tih thupui hmangin thusawina hun a nei a, inkhawm kaihruaitu Pu Lalbiakchama Chawngthu, DFO Thenzawl chuan Green Mizoram tobul leh kumin chhunga kangmei venna lama hmalak dan tlangpui leh Green Mizoram Day inbuatsaihnate tarlangin; District Level Fire Prevention intihsiaknaa tithate lawmman sem a ni bawk. Lawmman dawngtute hi pakhatna Khawbel, pahnihna E. Lungdar leh pathumna Buangpui te an ni. Anni bakah hian kangmei ven kawnga hma la tha khaw pathum dangte hnenah lawmthu sawina thilpek hlan an ni bawk a, a dawngtute chu; Neihloh, Keitum leh Leng khuate an ni.

A hawnna inkhawma tel te hian Pu R.L Chhuanawma, Honorary Wildlife Warden kaihhruaiin ramngaw humhalh turin thu an tiam bawk. Kumin Green Mizoram Day thupui hi “Thing phun ila, enkawl zui ang u” tih a ni.

A hawnna buatsaih zawh hian Khawtetlangah thingphun hnatlang buatsaih chhunzawm a ni a. He hunah hian District Level Green Mizoram Committee ten thingphunna hmun tur an thlan engemawzatah Head of Offices, sawrkar hnathawk, tlawmngaipawl, MJA leh midangten thing an phun a ni.