736/2023-2024

Aizawl 9th June 2023: Vawiin khan ‘Extended Pradhan Mantri Surakshit Matritva Abhiyan (E-PMSMA)’ hawnna inkhawm chu OPD Building, Obs & Gynae Department, Civil Hospital, Aizawlah neih a ni a, Pi Esther Lal Ruatkimi, Principal Secretary, Health & Family Welfare Department chu khuallian niin ‘E-PMSMA’ hawnna a nei.

Khuallian chuan Mizorama chengte atang a chhutin naupiang an la tam tawk lo hle ni a a hriat thu a sawi a. Nu naupai lai mekte leh nau la pai mai turte pawhin hrisel taka fa an neih theihna tur leh naupiang an pun tam zel theihna turin lawm tak a ‘E-PMSMA-‘a hawn thu a sawi a ni. Sawrkar laipui leh Mizoram sawrkarin hriselna a ngaipawimawh hle a ni tiin, a bik takin nu naupaite tan hamthatna tamtak a siam thin a; vawiina a hawn tak E-PMSMA- pawh chu sawrkar hmalakna pawimawh tak pakhat a ni,a ti. E-PMSMA chu nu naupaiten tha leh tluang taka nau hrisel tak an neih theihna tur a ni a, naupaite tan a nih ang takin chhawrthiam turin naupaite chu a chah a. Sawrkarin nu in nau hrisel tak a neih theih a ngaipawimawh hle tih tarlangin naupaite chu an dikna chanvo hre tur leh inthlahrung lo tur a ngen nghal in sawrkarin a thlawna naupaite tan hamthatna a siam te chu tangkai tak a hmang turin a chah a ni. Nau hrisel nei turin nu hriselna a pawimawh hle a ni tiin nu naupaite chu an hriselna uluk tur leh a hun taka doctor-te rawn thin turin a ti bawk. Naupai laiin ei leh in tih that a tul hle rualin zuk leh hmuam lamah pawh insum theih a ngai hle a ni tiin taksa enkawl kawngah tan la thar turin a sawm a ni.

Pi Esther Lal Ruatkimi chuan PMSMA chu tha thawkhat viau mahse a aia changtlung zawk ‘E-PMSMA’ chu sawrkarin a duang chhuak tih tarlangin hei hian nu naupai tan zau zawkin hamthatna a kengtel dawn a ni, a ti. E-PMSMA hlawhtlinna tur chuan Health Department leh nu naupai te inkarah thawhhona tha a pawimawih hle a ni tiin lungrual taka thawhhona awm turin hmalak zel a nih tur thu a tarlang a. Nau chunga nu thihna tihtlakhniam a nih ngei theihna turin E-PMSMA chu tangkai taka hmang turin kalkhawmte a chah nghal bawk.

Dr. Lily Chhakchhuak, SPO , RCH, chuan Extended PMSMA sawifiahna a nei a. PMSMA- chu kum 2016 khan din niin, National Health Mission (NHM) hnuaia Reproductive and Child Health (RCH) ten an kalpui tih a tarlang a. PMSMA-ah hian nu naupai mek ten an rai laiin vawi 4 an in entir ngei ngei tur zingah Doctor ngeiin vawi 1 tal en tura ruahman a ni a, thlatin ni 9-ah sawrkar damdawiin tinah a thlawnin naupaite chu en thin an nih thu sawiin, test hrang hrangte chu a thlawn emaw senso tlem thei ang berin lo tihsak thin an ni a ti. Extended PMSMA-ah hian naupai a bik taka enkawl ngai (high risk pregnancy) hmuhchhuah an nih chuan vawi-1 mai ni lovin vawi-3 thlengin in entir theih a ni dawn a, chu bakah thlatin ni 9-a in entir hman lo te tan pawh nidang ah in entirna hun siam sak tur a ni, a ti.

Vawiin ‘Extended PMSMA’  hawnna inkhawm hi Dr. Eric Zomawia, Mission Director, NHM chuan kaihruaiin,  kalkhawmte lawmna thu a sawi nghal a, Dr.Hmingthanmawii, Directorate of Health Services, chuan lawmthu sawina neiin hun a khar a ni.