733/2023-2024

Mamit 9th June, 2023 : Vawiin khan Highway peng, Luangpawl, Mamit-ah Green Mizoram Day, 2023 puala thingphun hnatlangpui hawnna hun hman a ni a, Pu V. L.Remliana, Mamit District Bawrhsap chuan khuallian niin he hun hi a hawng.

Khuallian chuan Green Mizoram Day puala hnatlanga thawkchhuak zawng zawngte District Level Committee on Green Mizoram, Mamit District hmingin chibai a buk a. Green Mizoram Programme chu Department pakhat mai hmalakna ni lovin Sawrkar Department hrang hrang leh Tlawmngaipawl leh khawtlang hruaitute thawhhona a ni a ti. Kan thingphunte a nung ngei em tih kan phun zawh hnuah hre chhunzawm turin kalkhawmte chu a chah a. Kan tu leh fate tana thingphun kan ni tih inhria a, kan environment duat nachang hre tur leh Plastic bawlhhlawh paih mai mai lo tur te, thingkit mai mai lo tur leh tuihna humhalh kawnga tan la thar turin kalkhawmte chu a chah bawk.

Pu C. Lalrinmuana, DFO, Mamit chuan report pein vawiina Sorkar Office hrang hrang, NGO leh khawtlang hruaitute thingphun zat hi 207 niin Mamit District-ah nikum 2022 thlengin thingtiak 151617 phun tawh a ni a. Heng zinga 50% vel chauh chawhrualin a nung a ni. Mizoram pumah Fire Prevention Award Kum 2009 atanga sem tan chu Kum 2014 leh 2016-ah lawmman pakhatna Mamit-in kan dawng a. Kum 2017-ah lawmman pahnihna, Kum 2019-ah lawmman pathumna leh Kum 2021-ah lawmman pakhatna kan dawn thu a sawi bawk.

Kumin Green Mizoram Day thupui hi "Thing phun ila, enkawl zui ang u" (Plant a tree and keep it safe) tih niin Highway peng atanga Bawngva Road kawngpui kamah thingtiak hi phun a ni.

Vawiin Green Mizoram Day-ah hian Fire Prevention Award Puala Mamit District chhung Village Level-a Kangmei veng tha khua thlanchhuahte lawmman hlanna khuallian hian nei nghalin pakhatna Rawpuichhip, Pahnihna Mamit Chhimveng leh Pathumna Zawlpui VC te an ni. Luangpawl, Mamit, Phuldungsei leh W. Lungdar hnenah Consolation Prize Rs. 10,000/- theuh hlan an ni bawk. Lawmman pakhatna hian Chawimawina thuziak bakah Rs. 50,000/- a keng tela, pahnihna hian Rs. 30,000/- leh lawmman pathumna hian Rs. 20,000/- a keng tel a ni.

Vawiin Green Mizoram Day hawnna inkhawm hi Pu K. Lalmuankima, Honorary Wildlife Warden, Mamit District chuan  kaihruaiin Pu F. Vanlalsawma, Range Officer chuan lawmthu sawina a nei bawk.