1270/2023-2024
Kolasib dated 26th July 2023: Vawiin khan Mizo Students' Union, Pangbalkawn leh Meidum Branch te buatsaih, Zirlai tiṭha lawmpuina hun chu Pu K.Lalrinliana, Minister, Food, Civil Supplies & Consumer Affairs Department chuan khuallian niin a hmanpui a, Pu Laldinsanga, Vice President, MSU General Headquarters chu Uaptu a ni. Pangbalkawn a hun hmanna hi Pu Vanlalhmudika Ngente, President, MSU Pangbalkawn Branch-in kaihruaiin Meidum a hun hmanna hi Pu Lalduhthanga, President, MSU Meidum Branch-in a kaihruai bawk a ni.
Minister Pu K.Lalrinliana chuan zirna hmang a Pangbalkawn leh Meidum khawtlang tihhmasawnna tur a MSU Pangbalkawn leh Meidum Branch hmalaknate chu fakawm a tih thu sawiin zirna in tihchangtlun kawngahte, raltlan zing a zirlai naupangten zirna an dawn theih nana an hmalaknate leh mi tin ban phak a zirna siam a nih theih nana an hmalaknate chu lawmawm a tih thu a sawi. Zirna chu hmasawnna hmanraw pawimawh tak a nih avangin eng hna pawh hlawhtling tak a thawk tur chuan zirna lam ah thiamna chhawrtlak an zir chhuah a pawimawh hmasak thu leh tih tak zeta zirna kalpui a ṭul thu Minister chuan a sawi. Pu K.Lalrinliana chuan hlawhtlinna chang tur chuan tum mumal neih a ngaih thu leh chu kan thil tum tihlawhtling tur chuan midangte aia thawhrim leh taimak inhuam a ṭul thu a sawi a, ram leh hnam, khawtlang tan a mi ṭangkai nih tum ṭheuh turin zirlai lawmpuina dawngte chu a chah bawk a ni.
Minister Pu K.Lalrinliana chuan hmun hrang hranga awm zofate chuan buaina leh harstana avangin Mizoram chu in pui a ngaiin inpumkhatna nghet zawk siam turin an luh khawm mek thu a sawi a, kan unaute an nih angin a ţul anga chhawmdawl leh ṭanpui chu kan mawhphurna a nih thu a sawi a. Hnam inlungrual leh inunaunna ṭha siam thiam apiang chu hnam ropui an nih ţhin thu Minister chuan sawiin chumi tur chuan ṭanrualna leh thawhhona ṭha neih a pawimawh thu a sawi bawk a ni.
Pu Laldinsanga, Vice President, MSU General Headquarters chuan zirna ngaih pawimawhna khua chuan hmasawnna hmel an hmuh thuai ṭhin thu sawiin zirna hmang a khawtlang ah hmasawnna thlen tirtu nih tum ṭheuh turin zirlai hlawhtlinna changte chu a chah a, ramri pel a hnazawn kawng ah taimak chhuah a ṭul thu a sawi bawk a ni.
Pangbalkawn ah hian HSLC pass zirlai 4, HSSLC pass zirlai 4 leh DIET hnuai a Diploma in Elementary Education Course pass chhuak zirlai 4 hnen ah lawmpuina thilpek hlan an ni a. Meidum ah hian HSLC pass zirlai 6, HSSLC pass zirlai 4 leh MA pass 1 hnen ah lawmpuina hlan a ni bawk.
Meidum ah hian District Education Office bultumin Education Awareness Program kalpui nghal a ni a, Pi K.Lalsiamliani, DEO chuan zirna tihhmasawn nan zirlaite leh zirlai nu leh pate mawhphurna chungchang inhrilhhriatna hun a hmang bawk a ni.
Vawiin Pangbalkawn leh Meidum a zirlai tiṭha lawmpuina hun ah hian khawtlang leh tlawmngai pawl hrang hrang hruaitute, school zirtirtu leh zirlaite an tel a ni.
Attachment
- Loading attachment...
