1269/2023-2024

Aizawl, 26th July, 2023 : Minister Pu Lalruatkima chuan vawiin khan Vanapa Hall-a Sports & Youth Services Department leh Mizo Zirlai Pawl tangkawpin thalaite tana Youth-20 Meet on Nationalism, Patriotism & Development an buatsaih chu khuallian niin a hmanpui.

Thalai kalkhawm hmaah thuchah sawiin khuallian Pu Lalruatkima chuan Y-20 meet thupui atana thlan “Nationalism, Patriotism & Development” chu Mizoram tan leh a chhunga cheng thalaite tan tha a tih thu leh thangtharte tan tunlai boruak nen inhmehna tak a nei ni a a hriatthu a sawi a. ram leh hnam hmangaihna rilru hi a dik lo zawnga kalpui theih a nih avangin kan ngaihtuahna a fim a tul a ni a ti a. Khawvelah hnam tam takin ram mumal nei lo va an awm laiin keini chuan ram ti a chhal tur kan pi leh pu ten min lo sahthlak saka min lo humhalhsak tawh kan rochun a, he ram kan thlahtuten luchhum banchhum huama an lo humhalh hi kan chan tur a ni lova, kan humhalh tlat tur a ni a ti a. Khawvelah hnam tam tak an lo ral tawh a, a ruh no no chhuakah tih khawvela kan chen avangin damkhawchhuak tur chuan kawng engkimah kan in fit a tul a, zawmthaw leh ngaihsam taka kan awm chuan kan la inchhir dawn a ni tiin, kan hnam leh ram hi ropui taka a dinchhuah theihnan thalaite chu ram leh hnam hmangaihna rilru pu chunga theihtawp chhuaha zir tur leh Mizoram tana mi tangkai nih ngei tum turin a chah a ni.

Khuallian chuan Mizo kan ni emaw, Kuki kan ni emaw, Chin kan ni emaw pawh nise kan danglam chuang lo, thisen inzawm vek kan ni a, kan chenna hmun a hrang rih mai a ni a ti a. Ramin ri nei mahse hnamin ri a nei lova, zohnahthlak tawh phawt chu zai khata kan luan a pawimawh takzet a, chhulkhat chhuak kan nih avangin Myanmar, Manipur, Tripura leh Bangladesh a kan unaute tahna hi kan tahna a ni a. An rilru natna hi kan rilru natna a ni ve thova, an tawrhna hi kan tawrhna a ni bawk, COVID hripui len nasat kan mangan laia eitur kan neih chhung chu in ril a tam lovang ti a min thlamuantute khan min mamawh ve hunah hian kan tlanchhiatsan thei lova, kan hawisan thei bik lo a ti a ni.

Khuallian chuan khawvela dingchhuak tur chuan kan tanrual a tul a, chumi bakah kan tam a ngai a ni a ti a. Hnam zahawm ni a dingchhuak tur chuan kan tam a tul a, mipate pawh innghahna tlak ni turin tun ai hian kan tan lehzual a ngai a, inchimralna chi hrang hrang a awm a, chung zingah chuan population assimilation hi a hlauhawm ber avangin mizote hi kan inthlahpun a tul a, ram leh hnam hmangaih tura zirtirna dik leh tha nen kan inkaihhruai a ngai a ni a ti.

Vawiin programme hi MZP Vice President Pu Andrew F. Lalramnghaka'n a kaihruai a, Lalhruaitluanga Chawngte, Adviser, MZP chuan keynote address a pe a. Vawiin programme-ah hian resource person pathumin presentation an pe a. Dr Martin Chawngsailova, State Program Coordinator, NP-NCD, NPHCE hnen atang cancer chungchanga thil pawimawh chi hrang hrang ngaihthlak a ni a. Social Media hman dan leh Cyber Crime chungchang zirtirna Pu Lalengzuala, Informatics Officer, ICT Department hnen atangin ngaihthlak niin, Administrative Training Institute (ATI) faculty Pi Golda Dell Zohmangaihi chuan Personal Empowerment chungchang a sawi bawk a, Pi Zonunthari, Deputy Secretary, SYS in lawmthuba sawi a ni.