Supply Minister Pu H.Rohluna chuan vawiin chawhma khan Mizoramin tuialhthei a lakna hmunpui ber Ramnagar-a IOC Oil depot a tlawh a, tuialhthei dinhmunte a enfiah nghal a ni.

Minister hi Pu Joydeep Dey, Senior Depot Manager-in lo dawngsawngin, Minister hnenah chuan tun dinhmunah tuialhthei dahkhawl sa a tam thu sawiin, Mizoram tan tuialhthei chungchangah hlauhthawn tur a awm loh thu a sawi bawk. Minister pawhin tuialhthei chungchangah Mizoram dinhmun a that thu sawiin an hnathawh dan ah lawmawm a tih thu sawiin Pu Dey pawhin thla hmasa lama Mizorama tuialhthei chungchanga harsatna awm chu a pawi an tih thu sawiin , hemi chungchanga Mizoram sawrkar hmalaknaah lawmthu a sawi ve bawk a ni.

Minister chuan Mizoram tuialhthei, abikin Diesel chu Manipur lamah divert anih thin thu lah a ngaimawh thu sawiin Pu Dey chuan a theih ang ang a hma lak a tum thu sawiin tunah pawh hian a enchhin nan Vehicle Tracking System (VHS) an hman tan thu a sawi a, hei hian tuialhthei phur motorte chu an thlen chin satellite hmangin an hriat zel theih dawn thu leh, an kalkawng atang an peng emaw, an ding emaw anih pawhin an hre vek thei tawh dawn ani a ti a, hei hian oil hralh ruk pawh nasa takin a veng thei dawn ani a ti bawk.
Ramnagar Oil Depot hian tunhma chuan Mizoram leh Barak valley a chawm thin a, kumin July thla atang khan Mizoram chauh a chawm tawh thu sawiin, Mizoram tan thlaphanna tur a awm loh thu Minister hi a hrilh a ni.

Ramnagar Oil Depot ah hian tum khatah Diesel - 9100 kilolitre, Petrol - 1860 kilolitre leh khawnvartui 5400 kilolitre a khawl theih a, nikhatah truck trip 70 vel thunkhat theiin, truck trip khat thun khah nan darkar chanve vel an mamawh thin a ni.

Minister hi Pu K.Lianzuala, MLA, Pu Rokunga Ralte, Jt.Director FCS & CA leh Silchar L.O Pu James Lalrinchhana ten an tawiawm a ni.