Vawiin khan Kolasib DC Conference Hall ah Kolasib bialtu MLA leh FCS&CA Minister mi bawk Pu K. Lalrinliana hovin kolasib District huam chhunga mi harsate insak tanpuina tur Pradhan Mantri Awas Yojana (urban) chungchang sawihona neih a ni.

Pu K Lalrinliana chuan Sawrkar Laipui emaw State Sawrkar atanga tanpuina awm thei chi reng rengah Sawrkar hnathawk bakah mipuite chu kan rinawm a ngai ani tiin tanpuina reng reng chu a mamawh leh dawng tur diktak in an dawn a ngai a, chumi ti hlawhtling tur chuan rinawmna kan vawn tlat a ngai ani a ti. Hemi bakah hian bank loan kaltlangin a punna hniam zawka rulh tur tanpuina te a awm foa a rulhna kawngah pawh hian rinawmna kan um a ngai ani a ti bawk.

District Urban Development Officer Pi PC Zonuntluangi chuan PMAY(U) hnuaia insak tanpuina component pahnih Beneficiary led construction (BLC) leh Credit Linked Subsidy Scheme (CLSS) chungchang chu power point presentation hmangin zirtirna a pe a. PMAY(U) chu khawpuia mi harsa zawkten kum 2022 a chenna in an neih vek theihna tura kum 2015 atanga Sawrkar laipui Scheme kalpui mek ani a Mizoram ah chuan Nodal Agency Urban Development & Poverty Alleviation hnuaia Demand Survey zirchianna behchhanin insak tanpuina mamawh te hnenah tanpuina hi pek an ni. Kolasib District ah hian PMAY(U) hnuaia insak tanpuina dawng tur te chu khawpui pali heng Kolasib, kawnpui, Bairabi leh Vairengte khua te telh an ni a, BLC bikah hian Kolasib Town tan 467.4 lakhs leh Kawnpui tan 223.2 lakhs chu State atanga dawn tawh ani a, Bairabi leh Vairengte dawn tur pawh peihfel tep a nih tawh thu tarlan niin heng khaw pali atang hian tanpui dawng tur mi 2618 te dilna chu pawm a ni.

CLSS hnuaia tanpuina dawng thei tur hi chi thuma then niin economically weaker Section (kum khata cheng nuai 3 lalut tlinglo), low income group (kum khata cheng 3,00,001 leh nuai 6 inkar lalut te) middle  income group 1 (kum khata cheng 6,00,001 leh nuai 12 inkar lalut te) leh Middle income group II (kum khata cheng 12,00,001 leh nuai 18 inkar lalut te) an ni a, khaw pali atang hian mi 189 te hnenah tanpuina pek tawh a ni.

He hunah hian Tuirial A/C bialtu MLA Pu Andrew H Thangliana bakah PMAY(U) kaihhnawiha Official hrang hrang leh Bank hrang hrang hotute an tel a ni.