Kolasib Salvation Army Hostel for the Blind a cheng khaw hmuh lama harsatna nei (blind) zirlai titha te chawimawina hun chu vawiin kha kolasib bialtu MLA leh FCS&CA Minister ni bawk Pu K. Lalrinliana chuan a hmanpui.

Minister chuan khaw hmulo vanduaina tawk zirlai te exam result thatak an nei chu Mizoram puma thil chhinchhiah tlak leh thil chhuanawm tak ani tiin result thatak an nei chu a lawmpui thu a sawi a, a bial chhunga hetiang zirlai tumruh leh an mahni enkawlna Home a awm chu a tan pawh inchhuanna tham a tling a ni tiin hemi kawnga hma latu leh engkim buaipuitu Chhandamna Sipai pawl (The Salvation Army) te inpekna chu ropui a tih thu a tarlang bawk.

Pu K. Lalrinliana chuan khaw hmulo zirlai naupang te chu fuihin Harsatna leh manganna an tawh fo a rin thu a tarlang a, heng hunah te hian Pathian chakna rinchhana kawng zawh a pawimawh hle dawn a Pathian chuan a kalsan ngai dawn loa Amah rinchhana hmalam hun chu beiseina nen pan tura chah in mi hlawhtling tak ni turin duhsakna a hlan a. Khuallian chuan bialtu MLA a nihna angin leh Zirlai titha te pass lawmpui nan The Salvation Army Home for the Blind a tan hian MLA fund cheng nuai 1 a hlan bawk a ni.

Kolasib District MJA President Pu R. Lalhmingthanga chuan zirlai bu nei mumal lo leh harsatna tam tak pal tlanga hlawhtlinna chang khaw hmulo zirlai te chu thinlung taka a chhuan thu sawiin an dinhmun te enin hetiang ang hlawhtlinna an chang thei hian an huaisen zia leh an pachan zia a tilang ani tiin an zir chhunzawm zel na turah duhsakna sang ber a hlan thu a tarlang bawk.

The Salvation Army Home for the Blind hi Kum 1977 April ni 15 a hawn niin Zirlai khawhmulo te chu a thlawnin chaw leh riahna an pe a hemi bakah hian mitvar school pangai leh college an kalna a an admission fee leh mamawh dangte pawh Chhandamna Sipai Pawl hian an tumsak vek thin a ni. He hunah hian HSLC leh HSSLC 1st Division leh Distinction a pass zirlai panga te chawmawi an ni a, Home din tirh atanga tun thlengin khaw hmulo (Blind) zirlai 40 in HSLC an pass tawh a, Mi 23 in HSSLC, mi 12 in B.A, mi 5 in M.A, pakhat in M.Phil passed tawhin Ph.D a ti mek a, helai hmun atanga zirchhuak khaw hmulo mi 17 te chuan Sawrkar hna an thawk tawh bawk a ni.