Vawiin khan Food Civil Supplies & Consumer Affairs Minister Pu John Rotluangliana hovin a pisaah FCS&CA officer-te an thukhawm a. Ration card surrender chungchang, LPG direct benefit transfer chungchang leh end-to-end computerization hnuaia ration card digitization chungchang sawiho a ni.
FCS&CA department chuan mi khawsa thei deuh chhungkuate’n mi harsa zawkte tana malsawmna an nih theihna remchang a nih hria a family ration card sorkara thehlut turin an lo ngen tawh a. Meeting-ah hian Ration card surrender duh chhungkaw eng emaw zat an awm nia a lan thu tarlan niin heng mite tan hian DCSO office kal kher ngai lova awlsam zawka an thehluh theih dan kawng hawn a tul niin an hria a. Sorkar hnathawkte tan Head of Department tinah leh sorkar hnathawk lo te tan Local Council/Village Council tinah a lakhawm tur ruat bik siam turin FCS&CA chuan ngenna siam se an ti a. Hetianga surrender tawh te hnenah hian official document atan chauha hman tur ration card pek chhuah an ni dawn a ni.
Tun dinhmunah Aizawl West DCSO bial chhungah ration card surrender mi 11 an awm tawh a, chungte chu:- Kaphnuni m/o L. Pachuau, Engineer in Chief, P&E, Upper Republic; Vanlaldika, EE, PWD, Bethlehem; Lt Col (Rtd) Kawlremsiama, Mission Vengthlang; Maj (Rtd.) Zosangliana Hualngo, Mission Vengthlang; Lalthuamliana, Joint Secretary, Tuikual North; Lalthanmawia Pachuau, Business, Kulikawn; R.Siamliana, DCSO,Dinthar ; Lt.Col.ZS Zuala, Parliamentary Secretary, Mission Veng; C.Zasanga, Addl.Director FCS&CA, Kanan; Zorammuana, Director UD&PA, Kulikawn leh Kaizamang Thangeo, Gazetted Officer, Tuikual ‘N’ te an ni. Aizawl East DCSO huam chhungah mi 3 – Pu John Rotluangliana, Minister, Dawrpui; Pu C.Chawnghnuna, Jt.Secretary PHE, Zemabawk leh Dr H.Saithantluanga, DAO (Aizawl), Ramhlun South-te’n an thehlut a. Kolasib DCSO bial chhungah chhungkaw pali ten an thehlut tawh bawk. Heti hian tun dinhmunah ration card surrender hi chhungkaw 18 an awm ta a ni. FCS&CA department chuan tlawmngaih chhuaha an card thehluttute zawng zawng chungah lawmthu an sawi tak meuh a ni.
Meeting-ah hian Direct Benifit Transfer on LPG (DBTL) chungchanga hmalak tawh dan thlirho a ni bawk a. Mizoram chhunga eirawngbawlna gas hmangtute zawng zawng chu DBTL tifel vek tura beisei an ni a. A tihfel theih hun chhung hi March 31 hian a tawp dawn tak avangin hun tawp hmaa in register hman vek turin FCS&CA department chuan mipuite a ngen a ni. End-to-end computerization hnuaia ration card digitization chungchang pawh enho niin DCSO tin ten an hmalak tawh dan an tarlang a ni.
FCS&CA Minister kaihhruai meeting-ah hian Parliamentary Secretary Pu T.T. Zothansanga bakah FCS&CA Directorate leh Secretariat a Officer-te, District tina DCSO te an tel kim hle.
