761/2023-2024

Kolasib dated 10th June 2023: Vawiin khan Pu K.Lalrinliana, Minister, Food, Civil Supplies & Consumer Affairs Department, Kolasib Assembly Constituency bialtu chuan Bairabi khua a hmasawnna hnathawh hrang hrang a endik a. 'River Training Works at Tlawng River, Bairabi' a hnathawhna kal mek te, Bairabi North leh South-a inhmun nei lote tan a MLA-LADS hmanga inhmun ruahman sakna kal mek te, Zophai ramri hnaih inkalpawhna thawm ṭhat hna kalpui mek te leh Bairabi Games and Sports Association Football khelmual laih hna thawh mek te a tlawh a. Er. Lalbiakzuala Filling Station, Bairabi North-ah a hawng bawk a ni.

Tlawng tui lian avanga Bairabi South-in harsatna an tawh thin sutkian nana 'River Training Works at Tlawng River' hna thawh mek hi hmun 4 a ṭhen a ni a, thawktu mi 4 an awm a ni. Minister Pu K.Lalrinliana'n a tlawh lai hian khawtlang hruaitute chuan tui lianin kopang a lak hek zel venna tur a hnathawh ṭhen 1-na, ṭhen 3-na leh ṭhen 4-na chu ṭha tak a thawh a nih laiin ṭhen 2-na lai ah erawh beisei angin hna kalpui a nih loh thu an lo thlen a. Hetiang a hna a khaihlak reng chuan ruahtui tlak tam hun ah harsatna lian zawk a thlen an hlauhthawn thu an sawi. Minister ṭawiawmtu Er. R.Lalduhthlanga, Sr.EE, National Highway Division III chuan River Training Works hi October ni 17, 2023 chhung a zawh hman tur a ruahman a nih thu leh tun dinhmun ah hna hi za a 70 thawk zo tawh anga chhut a nih thu a sawi.

Inhmun nghet nei loten insakna tur hmun an neih ve theih nana MLA-LADS hmang a Bairabi South-a inhmun 56, Bairabi South lei bul a inhmun 43 leh Bairabi North-a inhmun 56 ruahman te chu Pu K.Lalrinliana chuan a hmun ah a endik a. Bairabi GSA tan a Football khelmual laih mek chu a tlawh bawk a ni. Supply Minister hian Zophai ramri hnaih a inkalpawhna ṭha a awm theih nana kawng thawmṭhat hnathawh a tlawh a, ramri venhim nan leh ram hauh nan Zophai hmun a hmasawnna hnathawh kalpui a pawimawh thu a sawi.

Er. Lalbiakzuala Filling Station hawnna ah hian Minister Pu K.Lalrinliana chuan kan ram chhung ah tui alh thei chhek khawlna ṭha a awm loh avangin inkalpawhna ah harsatna a awm changin Petrol leh Diesel indaih lohna a thlen thuai ṭhin thu a sawi a, Oil Depot changtlung zawk siam a nih theih nan sawrkar pawn hma a lak mek thu a sawi. Petrol leh Diesel indaih lohna avanga harsatna thleng ṭhin chu kawng engemaw talin Er. Lalbiakzuala Filling Station hian a sutkian a beisei thu sawiin duhsakna a hlan bawk a ni.

Er. Lalbiakzuala Filling Station-ah hian HPCL Diesel litre 35000 leh Petrol litre 20000 dah khawl theih a ni a, vawiin atangin mipui dawr theih turin hawn nghal a ni.


Attachment

  • Loading attachment...