762/2023-2024

Aizawl the 12th June 2023 : Ni 09.06.2023 (Inrinni) khan Ministry of Skill Development and Entrepreneurship (MSDE) kaihhruaina hnuaia National Skill Development Corporation (NSDC), Labour Employment, Skill Development and Entrepreneurship(LESDE) Department, Govt.of Mizoram leh Medhavi Skills University te nen Tri-partite MoU hmangin thawhhona thuthlung an ziak ho a ni. He thawhhona hi "Mizoram International Centre for Innovation & Skills Excellence" din na atan a ni a. He Centre of Excellence (CoE) hian a hna hmasa ber atan India leh khawvel hmun hrang hranga Hospitality sector leh Paramedical staff leh nurse mamawhna sang zel phuhrukna turin Hospitality leh Healthcare skills lama hmasawnna tur course a kalpui dawn a ni.

He CoE hian Hospitality leh Healthcare sector-ah te bakah a kaihhnawih sector dangte nen international skills training leh mobility a buaipui dawn a ni. He MoU ang hian NSDC chuan infrastructure support atan bungraw thahnem tak a pe dawn a, Hospitality & Healthcare services lama talent tihpunna turin CoE tan knowledge partner angin a thawk ang a, CoE a zirchhuakte hi khawvel ram hrang hrangah hna hmuh sak turin NSDC in hma a la dawn a ni. He thawhhona ah hian LESDE dept. chuan CoE-a course awmte awareness siam turin promotional activities-ah a pui dawn a, administrative support a pe bawk ang. Medhavi Skills University hian nitin hnathawh dan enkawl hna a thawk ang a, ram pum leh khawvel puma company hmingthang tak takte manpower mamawh phuhrukna tur International standard angin quality skill training pekna tur ruahmanna a siam bawk ang.

Pu Ved Mani Tiwari, CEO, NSDC chu he agreement sign turin a lo zin a, a pualin programme Bawngkawn chhim veng Hall ah Medhavi PMKK in a buatsaih a ni. Pu Lalramsanga Sailo, LESDE Secretary chuan a lawmna thu a sawi a, central government Skill Development Mission hnuaia NSDC hmalakna a tarlang a, Mizorama NSDC kan hman tangkai dan a sawi bawk. Pu Tiwari chuan an hmalakna chungchang sawiin, “Hripui leng avang khan healthcare services leh sector dang engemaw zat hospitality, construction, logistics, information technology, leh a dangteah nghawng a neih ngai loh a thlen a, eizawnna thar tam tak a piang a, Asia ram changkang thenkhat leh Europe ram thenkhatah hnathawktu mamawh na a nasa chho zel bawk. North east India thalaite tan ram dang a thawhna tur remchang a inhawng chho zel dawn a, NSDC hian Mizoram thalai eizawnna dap te tan theihtawpin hma a la zel dawn a ni, Mizoram International Centre for Innovation & Skills Excellence hawn a ni dawn ta hi thalaite tana khawvel pum huapa hna thawhna hawnsakna kawng pawimawh tak a ni” a ti. NSDC hnuaiah Mizo Nurse ten Noida ah Japanese language training an nei mek a, Ministry of skill development hriatpuiin Japan rama thawk turin an inbuatsaih mek a ni. PMKVY hnuaiah training hmun hrang hrangah kalpui a ni mek bawk. NSDC buatsaih Kaushal Mahotsav (Online international job fair) ah Mizo thalaite test leh interview turin mi 280 an inziak lut bawk a ni.

He Thawhhona thuthlung hi Pu Lalramsanga Sailo, Secretary, LESDE Department, Pu Ved Mani Tiwari, CEO, NSDC leh Pu Kuldip Sharma, Pro Chancellor, Medhavi Skills University ten LESDE Minister Pu Lalchhandama Ralte leh Pi Angela Zothanpuii, Director LESDE Department te hriatpuina in an ziak ho a ni.