FCS&CA Minister Pu K.Lalrinliana chuan vawiin khan Mizoram Basketball Association (MBBA) promotional tour chu North Kolasib GSA Basketball Court ah a hawng.

Minister chuan MBBA leh KDBBA hruaitute bakah tournament khel tur players te chibai bukin promotional Tour thleng thei tura Kolasib District Basketball Association (KDBBA) hruaitute inpuahchahna chu fakawm a tih thu a sawi a. Tun dinhmunah Kolasib chuan khaw dang te angin basketball court la nei thalo mahse Sawrkar in infiamna tih hmasawn nan Kolasib ah nasa takin hma a la chho mek ani tiin Tumpui field sirah Basketball khelh theihna tur indoor stadium sakna tur ruahman mek a nih thu a tarlang ani.

Khuallian chuan rilru thianghlim pu chunga inkhel hmachhawn turin kalkhawm player te a chah a, tournament hlawhtling tak an neih theihnan duhsakna hlanin KDBBA President Pu Andrew VL Auva kutah tanpuina sumfai a hlan bawk ani.

MBBA Promotional tour ah hian MSL Club panga (5) bakah Lunglei, Champhai leh Mamit atangin club pakhat (1) theuh leh a thlengtu Kolasib atangin club pahnih (2) ten inelna an hmachhawn anga inrinni ah hmawrbawk tura ruahman a ni.