Nimin khan Lawngtlaia Central YLA Hall-ah World Vision India (WVI), Chhimtuipui Area Development Programme (CADP) hnuaia mi retheite chawi kanna tura hma lakna 'Graduation Model' kum thum chhunga kalpui kharna leh a ti thate chawimawina hun (Graduation Day) hman a ni.

He huna Khuallian, Lawngtlai East Bialtu MLA, Agriculture Development Board Vice Chairman ni bawk Pu H. Biakzaua chuan Pathianin a hmangaih mi retheite dawm kang tura World Vision India-in hma an lakna chu ropui a tih thu leh Pathian hna thawhpuitute an nia a hriat thu a sawi a. Graduation Model Programme kal tlanga WVI CADP hma lakna chu chhungkaw tam tak khawsak dawm kangtu a nih piah lamah, mi rethei fate'n zirna tha an dawn theihna tura kawng sialsaktu a ni bawk tih sawiin, he programme hi tawp mah se, WVI-in eizawnna kawng hrang hrang hmanga bul an tansak leh kawng an sah kuak chu chhunzawm a, hma sawn zel tura inbuatsaih turin rahbi thar chuang chhuak chhungkuate chu a chah.

He hun hi Lairam Isua Krista Baptist Kohhran (LIKBK) Chandmary Bialtu Pastor Rev. Dr Lalmuankima'n tawngtaina hmanga hawngin, WVI Chhimtuipui ADP-a Programme Manager Pu Paul T. Touthang chuan hun hman chhan a sawi fiah a. Hun hmanpuitu dang Lai Autonomous District Council (LADC)-a Executive Secretary Pu H. Lalramenga chuan World Vision India-in Lawngtlai District-a rei lo te an awm chhunga an hna thawh chu fakawm a tih thu sawiin, mi rethei zawkte leh naupangte tana an hna thawh chu hriat reng a ni tawh ang, a ti.

He hunah hian World Vision India hmunpui lama hotute - Dr James Neil Devasahayam Dk, Head, Technical Programme te; Pu Santosh Kumar, Technical Specialist te; Pu Anil Joseph, Senior Director-Programme leh Pu Samuel Therieh, Associate Director te'n Graduation Model Programme kalhmang leh India ram chhunga an hma lakna te an sawi a. He Graduation Model Programme hlawhtlinpui zual thlan chhuah mi pali hnen atangin testimony ngaihthlak a ni bawk.

World Vision India, Chhimtuipui Area Development Programme hian kum 2015 kum tawp lam atang khan Graduation Model hi kalpui tanin, batch khat hi kum hnih chhung awh tura ruahman a ni a. Kum 2015 atang khan batch 3 awm tawhin, batch khatah mi rethei dawm kan ngai chhungkaw 150 zel thlan chhuah niin, chhungkaw 450 te tan ei zawnna bul tanna tur ngaihtuahsak tawh a ni a. An hlawhtlin leh hlawhtlin loh teh nan teh fung chi hrang hrang 23 awmin, chu'ngte chu hriselna, ei bar zawnna leh khawsak phung chungchangah te a ni hlawm a. He'ng teh fung 23 atanga point 16 leh a chung lam hmu chin chhungkua 288 te chu graduate-a puan niin, he'ng a hlawhtlingte hi vawiin khan certificate hlan vek an ni a. Pi Darliani, Siaha Tlangkawna mi chu ti tha bera thlan niin, lawmman hlan a ni bawk.