Vawiin khan Khawzawl District huamchhunga Power & Electricity Department hnuaia thawkte tan Seminar on Energy Conservation and Electrical Safety buatsaih a ni a, Khawzawl Electric Veng YMA Hall a State Designated Agency (SDA) bultuma Seminar buatsaih hi Er. Laldawngliana, Electrical Inspector in a kaihruai a ni.

 Er. Laldawngliana chuan Sawrkar Laipuiin Energy Conservation leh Electrical Safety hi a ngaipawimawh tih sawiin Energy Conservation chungchang bikah chuan Energy Conservation Act 2001 hnuaiah State Designated Agency din a ni tih a sawi a, SDA hi Mizoramah pawh kum 2008 khan din a ni a, Mizoram chhungah awmze neia kawlphetha kan renchem theihna turin hma an la a, mipuite hnenah pawh zirtirna an pe thin tih a sawi a. P&E department staff kalkhawmte chu an hna uluk a, vanduaina thleng palh thei pumpelh turin hmanhmawh lo leh fimkhur taka hna thawk thin turin a fuih a ni.

 Seminar-ah hian Er. K. Duhsanga, EE, Khawzawl Division pawhin thu sawiin, Khawzawl a E.E. a a awm hnuah a huhova inhmuhkhawmna an la neih loh thu leh P&E Staff te inhmukhawm theihna hun tha an nei chu lawmawm a tih thu a sawi a, Seminar chu hlawkpui ngei tum turin P&E Staff kalkhawmte chu a chah a ni.

 Vawiin Seminar-ah hian Pu Vansangliana, Project Coordinator, SDA in powerpoint presentation hmangin Energy Conservation chungchangah zirtirna a pe a, Er. H. Zonunsanga, Chief Electrical Inspector in powerpoint presentation hmangin Electrical Safety-ah zirtirna a pe leh a ni. Hemi hnu hian Pu Lalsangzuala Sailo, JE, Electrical Inspectorate in lawmthu sawina hun hmangin Seminar hi a khar a ni.

Vawiin Seminar-ah hian Khawzawl District huamchhunga P&E Staff 160 chuang an tel thei a ni.