Vawiin khan Mizo Zirlai Pawl(MZP) chuan Zirlaite Ni Dawrpui Multipurpose Hall, Aizawlah an hmang a. He hun hi Pu Lalchhandama Ralte, Minister of State, School Education, etc chuan khuallian niin a hmanpui a ni.

He hunah hian, Zirlaite Pual bik liau liaua hun buatsaih a ni chu thil lawmawm tak,  zirna pawimawh zia inhrilh thar leh na atana  hun rem chang a nih thu Pu Lalchhandama Ralte, Minister of State, School Education chuan a sawi a. Mizoram sorkarin zirna a ngai pawimawh a,Zirna chu a lailumah a dah a ni a ti. Education Budget pawh zaa 24 a tihpun a ni a, zirtirtu mamawhna a sang tih hriaiin sorkarin zirtirtu 881 tun hnaiah tumkhatah a la a, hei hi sorkarin zirna a ngaih pawimawhzia lantirna a ni a ti.  Zirlai kalkhawmte chu ram mamawh chhanna ni turin a sawm a. Tun lai khawvelah a thiam thiam leh a chhawr tlak a piang an ding chang thin a.Chhawrtlak, mithiam ni turin tumruhna, taimakna, teirei peihna a ngai tih a sawi a. Zirlaite theuh theuh   kum 10, 20 hnuah chuan dinhmun a in ang lo thei thin hle a. A thiam leh chhawrtlak  apiang an ding chang dawn tih a chiang sa renga. Chuvangin tun atanga thil tuma chian leh kawng zawh tur lam thlan fel a pawimawh a pawimawh takzet a ni a ti.

Tun hnaia zirtirtu hnahruak hnawhkhah dante a sawifiah a. A mamawhtu Sikul Naupangte hmakhua ngaiin uluk tak leh hun rei tak khawhral si lovin zirtirtu hnaruakin thiamna leh qualification a phut  zawng zawngte nen pawh en mil a hnawhkhah a ni a.  Induhsakna lam hawia kalpui emaw dan kalha thiltih a awmlo a ni a ti.

Zirlaite Ni hmanna inkhawm hi Pu B.Vanlaltana Vice President, MZP in a kaihruai a, MZP President L.Ramdinliana Renthlei pawhin thu a sawi a. MZP hruaitute leh zirlai thahnem tak an kalkhawm a ni.