Health & Family Welfare Minister Dr. R. Lalthangliana chuan vawiin khan Mizoram New Capital Complex (MINECO) a Mizoram State Drug Testing Laboratory sakna tur lungphum a phum.

Lungphum a phum zawh hian hemi puala inkhawm tawi buatsaih ah Health Minister chuan thu sawiin Mizoram State Drug Testing Laboratory chu Mizoram tan thil hlu tak a ni dawn a ni a ti a, khawvel a changkan chhoh ang zelin mizote pawhin  ei leh in pawh kan ulukin kan fimkhur sawt tawh hle a, damdawi ei chungchangah pawh kan fimkhur sawt hle a ni a ti a. Sawrkar laipui pawhin damdawi tha leh thalo hriatna tur Drug Testing Laboratory siam hi a ngaipawimawh hle a ni a ti.

Health Minister chuan damdawi company lar tak tak leh tha tak tak ni a kan hriatte pawh an damdawi siamchhuah te a him leh himloh endik a tul chang a awm thin a ni a ti a, heng bakah hian Mizoram chhunga ei leh in tur kan siamchhuahte leh Mizoram pawn atanga ei leh in tur kan lakluh te pawh mipuite tan a him leh himloh awlsam tak leh rang takin kan hre zung zung thei tawh dawn a, Guwahati a a sample thawn a hun engemaw chen a result nghah ngai thin kha kan pumpelh thei dawn a nia  ti a. Damdawi leh ei leh in te a zavaia test a harsa a nih pawhin a rinhlelhawm chin chu test vek kan tum dawn a ni a ti bawk.

Cheng nuaih zathum senga sak tur Mizoram State Drug Testing Laboratory hi MINECO ah awmin Mizoram Pollution Control Board (MPCB) office panna peng, kawngpui an ah sak a ni dawn a, a sa tur hian Mizoram Technocrats Company Pvt. Ltd. te thlan an ni a, sak a nih tan atanga thla 18 chhunga sak zawh tur a ni.

Mizoram State Drug Testing Laboratory sakna tur lungphum phumna ah hian Hwalth & Family Welfare Board Vice-Chairman Dr. Z.R.Thiamsanga, MLA bakah Health & Family Welfare Department Secretary Pu H. Lalengmawia leh Health & Family Welfare Department hotute an tel a ni.