Kar khat awh tur International Workshop on Recent Advances in Academics (RAA 2019) tih thupui hmanga neih chu vawiin khan Prof. KRS Sambasiva Rao, Vice Chancellor, Mizoram University chuan Government Champhai College Multipurpose Hall-ah a hawng. He hunah hian Prof. Lalnundanga, Registrar, Mizoram University chu khualzahawm a ni.

Hawnna inkhawmah khuallian  Prof. KRS Sambasiva Rao chuan Champhai leh a chhehvel chu theihna sang tak nei ram pawn lam mite tan pawha zirna tha zawk pan theihna tura hmun rem leh duhawm tak a ni, a ti a. Champhai College hmasawnna fakin College changtlung zawk nakin zela Campus lian leh University Campus thleng pawha siam anih theihna tura tan lak a ngaih thu leh lo inhmakhua lawk nan PG Course Subject thenkhat  atanga tan tum turin a fuih a.   Thawktu leh Zirlaite chu College tha leh thalo tehna NAAC Assesment kum 2021 a neih  tur hrereng chunga tehfung  hrang hrangte hlen tum tur leh  hamthatna tam zawk dawng thei tur rilru seng turin a chah a. Khuallian chuan Mizoram University chu India rama University tha berte zinga mi anih tawh thu sawiin, tun hnaiah  MZU chu chak taka a than thu tarlangin, tiang  zela a thang anih chuan tun atanga hun rei loteah chuan India rama University tha zual 25 zingah a tel ve ngei a rin thu a sawi  bawk. MZU chuan tun October thla chhung ringawt pawh hian Project 300 chuangah  hmalak tuma dilna a siam thu leh hetiang hi India ram University dangah pawh a awm ngai lem loh thu a sawi a. Zirlaite chu rilru leh ngaihtuahna zau zawk  puchunga a taka hman nghal mai theih tur  thiamna chhawrtlak tak zirchhuah tum tura fuihin, harsatna leh mamawh an neih changin Zirtirtu leh thuneitu sang zawk thlenga hrilhhriat hrehlo turin a chah bawk a. MZU Vice Chancellor chuan Government Champhai College kalzelna turah duhsakna hlanin College campus tih len leh than zelna tura mamawh an neihah a theihna ang zela puih a inhuam reng thu a sawi bawk a ni. International Workshop on Recent Advances in Academics 2019 neih tur chu chhimtu zawng zawng leh a hmang tangkai tur ten an hlawkpui ngei theihna tura duhsakna hlanin a hawng a ni.

Thusawitu dang Prof. Lalnundanga, Registrar, Mizoram University chuan zirna sang zawkah chuan zir thiamna hrang hrang tanho angaih thu leh zirbingna research a tanga hmuhchhuahte  Lehkhabua chhuah mai duh tawk lova  a hmang tangkai  tur dik tak mipuiten a taka an chhawr tangkai theih a tul zawk thu a sawi a.  Mahni  kutkawih leh thiamna neih hmanga eizawnna mumal tak  neih duhte  puitu tur Incubation Centre 4 lai MZU-ah siam anih thu sawiin,  thiamna kawng thlan ang zelin mithiamte kaihhruainain eizawnna puitling nei tura puih thin an ni, a ti bawk. 

Hawnna hun hi Pu L.Khuma Varte, Asso. Prof, Geography Dept, Govt. Champhai College chuan a kaihruaia.  Pu P.Lalhmingliana, Principal Govt. Champhai College-in kalkhawmte lawmna thu a sawi a. Pu C.Chalthanga, Asso. Prof & Head English Dept, GCC in Workshop neih anih chhan tlangpui a sawi a. Pi Thangmawii, Asso. Prof, Education Dept, GCC in lawmthu sawiin hawnna hun hi a khar a ni.

Workshop hi RUSA 2.0 Equity Intiatives Fund bultum niin, IQAC Govt. Champhai  College  buatsaih a ni a. Workshop hi October Ni 28 atanga November Ni 1, 2019 chhung hian Govt. Champhai College Seminar Hall-a neih tur niin, hemi hun chhung hian India leh Myanmar atanga lokal sawm bik mithiamte  hnen atangin tunlai thiamna hmanga zirna hmasawn dan te zirchianna topic hrang  hrang hmangin neih thin a ni ang.