Vawiin chawhma khan Central Hall, Venghlui ah Mizoram Consumers’ Union chuan General meeting vawi 18-na a thleng a. He khawmpui senso hi FCS&CA in tumsakin khuallian ah Food Civil Supplies & Consumer Affairs Minister Pu John Rotluangliana chu sawm a ni. MCU khawmpui hi hun thum ah then niin he hunah hian MCU member kalkhawmte chuan LPG services, investment/banking services leh Telecom services chungchang zirchianna leh heng thil a consumers te harsatna sutkian dan tur te an ngaihtuahho a ni.

MCU meeting a thusawitu, FCS&CA Minister Pu John Rotluangliana chuan thiltha duhtute fuankhawm zinga a tel thei chu lawmawm a tihtakzet thu a sawi a. Zoram mipui tam zawkin MCU te hi hmelhriatin zawm se Mizoram ah dikna in ro a rel theih a rin tlat thu a sawi. State pawn, thenawm lawkah petrol a tak zawk a, Mizoram chhungah mipui chan ai buhfai tihching pen a tam zawk te leh LPG gas tihchingpen a ni fo thin te hi zoram mipuite inbihchian kan ngaihzia tilangtu a ni a ti a. Pawl hrang hrang te leh mi thenkhatten an hun pui ah te sum hrawmna zawk ran chikim an talh theih laia buhfai, mipui chanai liau liau lak pen tuma sawrkar an dil fo te hi titawp turin khauh takin hma lak mek zel a ni a ti. Mega Block hma aiin tun dinhmunah buhfai a hnianghnar zawk a. Achhan chu pawl leh mimal anga special permit leh a bik taka bufai an dil thin te sawrkar in a tih tawp vang a ni a ti. Zoram mipuiten buhfai, gas leh petrol an tlakchham mai loh nan biak ngai, umzui ngai leh nawr ngai apiang sawrkarin a hmaih lova. A enkawltu Minister a nih ang pawhin Zoram mamawh enkawltu mipawimawhte a lian leh te awm lova a pan thin thu leh ruahmanna a siam pui thin thu, FCS&CA Minister chuan a sawi a ni. Bairabi rel kawng zauh hna thawh mek pawh a va tlawh tawh thu sawiin, work schedule anga hna kalpui a ni a ti a, nakum March thla chuan hna hi thawk zo tawh tura beisei a nih angin an zawh theih mai pawh a beiseiawm a, a lawmawm hle a ni a ti.

FCS&CA Minister Pu John Rotluangliana chuan AAY leh BPL ten buhfai an dawn thin chu a ngaia kalpui a ni ang a, anni tih loh quota pangai khul thin te buhfai erawh 1 kg ah Rs. 9.50 atangin 1 kg ah Rs.15 a tihpun tum a ni a ti. Quota pangngai mi harsa lutuk lova ngaihten an khulh ve thin quintal 80,000/- chu FCI atangin economic cost anga 1kg ah Rs 29.81 a lei normal quota a 1kg ah Rs. 9.50 a sem a ni thin a. Hei hi sawrkarin a khulhna man tihpun ngai a tihlai a nih thu a sawi a. Tunah hian normal quota tur buhfai hi private supplier hnen atangin FCI rate aia tlawm zawk 1Kg ah Rs 25.75 a lei mek a ni a ti. Private supplier te hnena atanga lei a nih hnu leh normal quota rate tihpun a nih atangin sawrkarin FCI a dawr thin laia a kum khat chhung senso chu Rs.91,77,60,000/- zet in a hniam phah dawn a ni a ti. Minister chuan mi awm thei zawk te leh officer-te chu an ration card surrender tura ngen an la ni dawn a, heng mi tlawmngai zual sawrkar ngenna tihhlawhtling tute tan hian buhfai lak nan a hman tur nilo document pawimawh atana a hman theih ration card siam a ni ang a ti. Mi tlawmngaite quota surrender tak atang hian mi harsa zawkte quota khulh tihpun a theih phei chuan a lawmawm ngawt ang a ti a ni.

MCU general meeting hi an pawl President Pu Thanglura’n a kaihruai a. LPG services chungchanga mipuite chanvo IOC official atanga ngaihthlak niin Banking services leh investment chungchanga mipui hriattur chu Bank lam mithiam in a sawi bakah Telecom services a consumer-te chanvo leh dawn tur chungchang BSNL official in a sawi thung a ni. Mipuite hriatna tihzauna tura MCU in a buatsaih lehkhabu, “LPG services leh consumer-te chanvo Mizoram ah” tih lehkhabu pawh FCS&CA Minister hian a tlangzarh nghal a ni.