Vawiin khan Synod Conference Hall-ah tunhnaia Itanagar, Arunachal Pradesh-a, North East Games vawi 28-na a Mizoram aiawh infiammiten an medal lak lawmpuina programme Mizoram State Sports Council (MSSC) in an buatsaih, he hun hi Sports & Youth Services Minister Pu Zodintluanga’n a hmanpui a ni.

Pu Zodintluanga chuan infiammi Mizoram aiawh a fehchhuak te chu lawmthu hrilhin an medal lak te chu Mizoram tan hlawhtlinna ropui tak a nih thu a sawi a. Infiammite chu an dinhmun duh tawk mai lova, tumruhna leh tuarchhelna nen tuna an dinhmun ai sang zawka inhlangkai tur leh an rilru leh an taksa te inbuatsaih turin a fuih a.

Nakin lawk a National Games awm tur leh nakum a Himalayan Sports Festival awm tur atan inthlahdah lova tun atanga inbuatsaih turin a chah a. Kei ka ni tih rilru ang chi leh mahni inthunun thei lo leh ruihtheih thil laka fihlim lo chu, infiammi an ni emaw, coach leh official an ni emaw, huaisen takin heng ang mite chu Mizoram aiawh in kan fehchhuak tir dawn lo a ni, a ti. Infiamna lamah pakhatna leh pahnihna kan ni vut vut thei lo anih pawhin heng kan medal lak leh kan hlawhtlinna te hi sports lama Mizoram hmasawnna a ni zel ang tiin infiammite chu an nau zawkte tan entawntlak ni tura chahin an nunchangte uluk lehzual turin a fuih bawk a ni.

Medal lawmna programme hi MSSC Secretary, Pu C. Laltlanthanga’n kaihruaiin Pu H. Thangchungnunga, SPO leh Chef-De-Mission ni bawk chuan North East Games vawi 28-na inbuatsaihna leh hlawhtlinna chungchang a report a ni.

Sports Minister leh MSSC President ni bawk Pu Zodintluanga, Sports & Youth Services Director Pu Lalzirmawia Chhangte, Pu John Kima, Vice Presisent, MSSC leh MSSC hotu dangten infiammite medal lak leh anmahni tawiawmtu coach leh official te lawmpuina thilpek an hlan a ni.

North East Games vawi 28-na ah hian Mizoram hi Medal Tally-ah 4-na niin Mizoram aiawh infiammite hian Gold Medal 20, Silver Medal -27 leh Bronze Medal 34 an la a (a vaiin Medal 81). Boxing (Mipa) leh Badminton (Mipa) ah te hian a pumpui a titha ber lawmman Overall Champion Trophy an la a. Badminton (Hmeichhia), Judo (Mipa leh Hmeichhia), Karate (Mipa) leh Taekwondo (Mipa) ah te hian Runners Up Trophy an la bawk a ni.

North East Games vawi 28-na ah hian infiammi 86 leh official leh coach mi 16 an zuk fehchhuak a ni. Badminton, Boxing, Karate, Athletics, Weightlifting, Taekwondo, Judo, Wushu leh Football a inelnaah te an tel a. Badminton ah hian Gold 2, Silver, 2 leh Bronze 1 an la a; Boxing-ah Gold 6, Silver 4 leh Bronze 7 an la a; Karate-ah Gold 2, Silver 7 leh Bronze 3 an la a; Athletics-ah Gold 1, Silver 2 leh Bronze 2 an la a; Weightlifting-ah Silver 5 leh Bronze 3 an la a; Taekwondo-ah Gold 3, Silver 3 leh Bronze 3 an la a; Judo-ah Gold 4, Silver 5 leh Bronze 7 an la a; Wushu-ah Gold 2, leh Bronze 5 an la a; Football ah 4-na a ni bawk a ni.

2012 a Mizoramin North East Games a thlen tum khan Mizoram hi Medal Tally-ah 1-na a ni a, 2013 khan Mizoram hi Medal Tally-ah 2-na a lo ni tawh a ni.