1936/2023-2024

2023 Mimkut thla ni 19: Vawiin khan Mizoram Sawrkara Food, Civil Supplies & Consumer Affairs Minister, Kolasib Assembly Constituency bialtu MLA Pu K. Lalrinliana chuan a bial chhunga khaw pali - Bairabi, Meidum, Pangbalkawn leh South Chhimluanga Family Oriented Socio-Economic Development Programme (SEDP) Phase 2 hnuaia ṭanpuina dawng turte tana thil pawimawh inhrilhfiah tharna, "Beneficiary Assembly & Re-orientation" buatsaih chu an khuaah kal chilhin a hmanpui.

Khuallian Pu K. Lalrinliana chuan Mizoram ei leh bar leh sum leh pai dinhmun (economy)-in hma a sawn a, kan intodelh theih nan leh ei zawnna ngelnghet nei lote'n ei zawnna ngelghet an lo neih theih nan SEDP chu Sawrkarin a ruahman tih a sawi a. Hun hmasa lamah ram hmasawnna ruhrel atana pawimawh - inkal pawhna kawng ṭha, tui thianghlim in tur hnianghnar, leh kawlphetha ṭha leh hnianghnar kan neih theih nana hma lak nan leh line department hnuaia hma lakna tur ruahmanna atan te sum dah niin, he'ngah hian hma lak hmasak a ni, a ti a. COVID-19 hri leng avang leh lirnghing, ramri buai leh raltlan boruak avang te'n ruahman lawk lohnaa sum hmanna tur tam tak awmin, hun eng emaw chen SEDP pawh kalpui chhunzawm theih a nih loh hnuah mimal leh chhungkuain ei zawnna ngelnghet an neih a, an intodelh theih nan Family Oriented SEDP (FOSEDP) hnuaiah hma lak chhunzawm a ni leh thei ta chu lawmawm a tih thu a sawi a. FOSEDP Phase 1 kalpui mekah beneficiary 60,000 hnenah ṭanpuina instalment 2 pek tawh niin, instalment dang pawh la pek chhunzawm zel tum a ni a, tunah beneficiary 60,000 bawk tinzawnin Phase 2 bul ṭan leh mek niin, pawisa pawh beneficiary-te account-ah thun ṭan a ni tawh a, Phase 3 pawh a tahtawla chhunzawm zel tura ruahman niin, Governing Board leh Executive Board te'n an pawm tawh tih a sawi a. Ṭanpuina hi la sem chhunzawm zel tur niin, cheng nuai thum thleng pek tum a ni, a ti.

Minister Pu K. Lalrinliana chuan SEDP chu hlawhtlinpui theih a ni tih hria a, an hma lakna puitling ngei tura theih tawp chhuah tur leh tu leh fate tan pawha chhenfakawm leh chhunzawm zel tlaka hma la turin beneficiary-te chu a chah a. Trade thlanah fimkhur a ngaih thu te, ran vulh leh hma lakna dangah insurance tih nachang hriat a pawimawh thu te sawiin, mahni zawh tawka bul ṭan a, hma zauh zel turin beneficiary-te chu a chah a. Ram leh hnam zahawm ni turin intodelh a ṭul tih sawiin, intodelh turin mamawh tihtlem te, inrenchem leh sum khawl te a pawimawh tih a sawi a. Sawrkar aṭanga ṭanpuina dawn theih ang apiang dawn a, hmasawn nana hman si loh chu thil zahthlak tak a nih thu sawiin, SEDP ṭanpuina dawngtute chu an pawisa dawn te bul ṭan nan leh hma zauh zel nan ṭangkai taka hmang tura chahin, an hma lakna chu intodelhpui a, hausakpui tum turin a chah a ni.

Family Oriented SEDP Phase 2 beneficiary assembly & re-orientation hi Bairabi khaw tan Bairabi North YMA Hall-ah, Meidum khaw tan Meidum VC House-ah, leh Pangbalkawn leh South Chhimluang khaw tan Pangbalkawn Community Hall-ah te buatsaih ni a. Bairabi Sub-Divisional Officer (Civil) Dr Lalramdintluanga'n hun kaihruaiin, line department hrang hrang hotute aṭangin, Kolasib District Animal Husbandry & Veterinary Officer Dr Lalsanglien Ralsun; Land Resources, Soil & Water Conservation Department, Kolasib District-a District Officer Pu Z. Lalthanzuala, Kolasib District Commerce & Industries Officer Pu B. Zoramchhana, Kolasib District Fisheries Development Officer Pi C. Lallianpuii leh Kolasib District Horticulture Officer Pu C. Zosangliana te'n SEDP chungchanga hriat tur pawimawh hrang hrang leh beneficiary-te fuihna thu an sawi a ni.

FOSEDP beneficiary assembly & re-orientation buatsaihah hian Minister hi sawrkar official leh line department hotute leh political party hruaitute'n an ṭawiawm a. He hunah hian khawtlang hruaitute leh FOSEDP Phase 1 leh Phase 2 hnuaia beneficiary-te an kal khawm a ni.

Family Oriented SEDP Phase 2-ah hian Kolasib District chhungah department hrang hrang pariat - Agriculture; Animal Husbandry & Veterinary; Commerce & Industries; Fisheries; Horticulture; Land Resources, Soil & Water Conservation; Sericulture leh Urban Development & Poverty Alleviation department-te hnuaiah beneficiary 4,438 awmin, Kolasib Constituency bikah beneficiary 1,471 an awm a. Beneficiary-te account-a pawisa a luh theihna atana pawimawh APR sign kalpui chhoh mek niin, APR sign tawhte chu tunkar chhung hian an account-ah ṭanpuina 1st instalment ₹ 25,000/- chu lut fel hman tura beisei a ni.